काठमाडाैं : मनसुन सुरु भएसँगै अहिले देशभरको मौसम बदली भएको छ र देशका अधिकांश स्थानमा पानी परिरहेको छ। लगातार परिरहेको झरीका कारण बाहिर निस्कने अवस्था छैन। त्यसैले यस्तो बेलामा तपाईले खानपानमा विशेष ध्यान दिन जरुरी हुन्छ। किनकी झरीको मौसममा घरमा रहेकाहरुले र काममा गएकाहरुले झरीको मौसमका खानालाई ख्याल गर्न जरुरी छ। आखिर के खाने त झरीको समयमा ?
मकै :- यो मौसममा प्रशस्त मात्रामा पाइने हुँदा मकैका विभिन्न परिकार बनाएर खाने चलन छ। हरियो मकै पोलेर वा उसिनेर खान सकिन्छ। त्यसैगरी दूधालु मकैलाई पिसेर रोटी तथा फाडो सुप बनाएर खाने चलन पनि छ।
भटमास :- अहिले भटमास पाइने समय हो। विशेषत साउन भदौमा हरियो भटमास प्रशस्त पाइन्छ। उसिनेर खानेदेखि लिएर छोडाएर दालका रूपमा समेत हरियो भटमास प्रयोग गरिन्छ।
खीर :- असार, साउन भदौमा दूधको उत्पादन बढी हुने भएकाले यो बेला बढी खाइने परिकारमध्ये खीर पनि एक हो। दूधमा चामल, मकैको च्याख्ला आदि खाद्यान्न मिसाएर खीर पकाइन्छ। यसलाइ स्वादिष्ट बनाउन घ्यू, काजु, नरिवल, मरिच आदि मसला समेत हालिन्छ। यी मसलाबाट प्राप्त हुने ऊष्णताले वर्षा याममा भिजेको शरीरलाई विभिन्न रोग–व्याधिबाट जोगाउँछ।
हरियो काँक्रा तथा खोर्सानीको अचार :- यो समयमा प्रशस्त मात्रामा खोर्सानी पनि फल्छ। हरियो काँक्रा तथा पिसेको हरियो खुर्सानी निकै स्वादिलो हुन्छ।
अदुवा र तुलसी :- अदुवाले यो समयमा हुने विभिन्न प्रकारका इन्फेक्सनबाट जोगाउँछ। त्यसैले चिया, सुप, खिचडीजस्ता विभिन्न परिकार बनाउँदा अदुवा तथा तुलसी प्रयोग गर्नु लाभदायक हुन्छ। झरीको चिसो मौसममा सुप खाँदाको मज्जा नै बेग्लै हुन्छ।
