images

महासेठसँग रुष्ट सञ्जय ‘टक्ला’ फोरम पस्दै 

हो, हामी उपेन्द्रजीको पार्टीमा जाँदैछौं : साहका सहयोगी नवीन यादव
द नेपालटप | प्रकाशित: २०७५-८-२२ गते
महासेठसँग रुष्ट सञ्जय ‘टक्ला’ फोरम पस्दै 

काठमाडौं : विभिन्न मुद्दामा पुर्पक्षका लागि थुनामा रहेका पूर्वराज्यमन्त्री सञ्जय साह ‘टक्ला’ ले पुराना सारथि उपेन्द्र यादवको कित्तामा फर्कने गृहकार्य थालेका छन् । प्रत्यक्ष राजनीतिक संरक्षणबिना मुद्दामामिलामा पैरवी गराउन र राजनीतिक वृत्तमा उपस्थिति देखाउन पनि नसकिने विश्लेषण गर्दै उनी संघीय समाजवादी फोरम नेपालसँग निकट हुन खोजेका हुन् । 


सञ्जयका सहयोगी र उनी नेतृत्वको मधेसी क्रान्ति फोरमका धनुषा अध्यक्ष नवीन यादवले फोरम अध्यक्ष यादवसँग भेटेर आफ्नो समूहको सुरक्षित राजनीतिक अवतरणका बारेमा चर्चा गरेपछि सञ्जय यादवको कित्तामा पस्न थालेको खुलासा भएको हो ।

 

‘फोरम अध्यक्ष यादवसँगको भेटमा नवीनले ठूलो संख्यामा रहेका सञ्जय समर्थकलाई पार्टीसँग जोड्ने जनाउँदै त्यसबापत सञ्जयको रिहाइका लागि पहल गरिदिन आग्रह गरेका छन् । यद्यपि अध्यक्ष यादवले यस विषयमा अहिलेसम्म कुनै आश्वासन दिएका छैनन्,’ फोरम स्रोतले भन्यो । तर, मधेसी क्रान्ति फोरमका नवीनले भने केही दिनपछि जनकपुरमा आयोजना हुने कार्यक्रममा आफूहरूले फोरमको सदस्यता लिने बताए ।

 
प्रतिनिधिसभाको गत निर्वाचनमा सञ्जय र उनका समर्थकले नेपाली कांग्रेसका नेता विमलेन्द्र निधिका पक्षमा चुनावी क्याम्पेन गरेका थिए । यसअघि सञ्जय तत्कालीन सद्भावना पार्टीमा आबद्ध थिए । सद्भावनाका अध्यक्ष राजेन्द्र महतोले आफ्नो राजनीतिक जीवन समाप्त पार्न जालझेल गरी आफूलाई पक्राउ गर्न लगाएको भन्दै सञ्जयले चुनावमा निधिलाई साथ दिएका थिए । निधिका चुनावी प्रतिस्पर्धी महतो नै थिए । 


चुनावमा कांग्रेस कमजोर ठहरिएपिछ र निधि पनि पराजित भएपछि विचलित सञ्जयका समर्थक नेकपा नेता एव‌ं मन्त्री रघुवीर महासेठको कित्तामा पुगे । उनीहरूले सञ्जयलाई छुटाउन महासेठमाथि दबाबसमेत बनाए । महासेठले सञ्जयको रिहाइका लागि वातावरण बनाउन पार्टीका शीर्ष नेताहरूसँग कुरा पनि गरे । तर, अन्तिम समयमा आएर महासेठ पछि हटे । नेकपा कार्यकर्ताले सञ्जयलाई छुटाउनु आत्मघाती हुने जिकिर गरेपछि महासेठ पछि हटेका हुन् । 


त्यसलगत्तै सञ्जयले सत्तारुढ फोरम अध्यक्ष यादवको छत्रछायामा अघि बढ्ने निधो गरेका हुन् ।   
   
पहिलो मधेस आन्दोलनपछि तत्कालीन मधेसी जनअधिकार फोरम नेपालका अध्यक्ष यादवको अप्रत्याशित निर्णयबाट सञ्जयले संविधानसभा सदस्यको टिकट पाएका थिए । तत्कालीन एमाले नेता महासेठ र कांग्रेस नेतृ लीला कोइरालालाई पराजित गर्दै उनी पहिलो संविधानसभामा पुगेका थिए । सोही कार्यकालमा फोरम फुटेपछि उनले विजयकुमार गच्छदारकाे नेतृत्वमा फोरम लोकतान्त्रिक बनाए । त्यसैबेला उनी भौतिक योजना तथा पूर्वाधार राज्यमन्त्री नियुक्त भएका थिए ।


गच्छदारसँग असन्तुष्ट भएर फोरम लोकतान्त्रिकलाई विभाजित गर्न पटकपटक असफल प्रयत्न गरेका उनले त्यसो गर्न नसकेपछि मधेसी क्रान्ति फोरम गठन गरी मधेससम्बद्ध मुद्दालाई लिएर आफ्नो राजनीतिक गतिविधि बढाएका थिए । 


संविधानसभा २ को निर्वाचनपूर्व राजेन्द्र महतो नेतृत्वको तत्कालीन सद्भावना पार्टीमा प्रवेश गरेका सञ्जय पार्टीकाे वरिष्ठ उपाध्यक्षमा नियुक्त भए । यद्यपि सद्भावनाका अन्य नेताले भने उनी वरिष्ठ उपाध्यक्ष रहेको कहिल्यै स्वीकार गरेनन् । सद्भावना पार्टीकै तीर छापबाट संविधानसभा २ सदस्यमा निर्वाचित भएका सञ्जयले पार्टी फुटाएर आफैं अध्यक्ष बन्न खोजेको आरोप लागेको थियो । 


यसैबीचमा सञ्चारउद्यमी अरुण सिंहानिया हत्याकाण्डमा उनको नाम मुछियो र फरार भए । त्यसपछि तत्कालीन सद्भावना अध्यक्ष राजेन्द्र महतोको सुराकी र दबाबका कारण भारतीय प्रहरीले उनलाई दिल्लीबाट पक्राउ गरी नेपाल प्रहरीलाई बुझाएको आरोप सञ्जयले लगाउँदै आएका छन् । ‘मैले महतोबाट अभिभावकजस्तो राजनीतिक संरक्षण खोजें र सम्पर्क गरें तर उनले मलाई फसाए । खासमा मलाई सिद्धयाएर जनकपुरबाट चुनाप लड्ने महतोको दाउ रहेछ,’ पक्राउ परेपछि सञ्जयले सञ्चारकर्मीसँग भन्ने गरेका थिए ।

द नेपालटप

द नेपालटप

images
images
सम्बन्धित समाचार

बार अध्यक्षमा वामपन्थी समूहका श्रेष्ठ विजयी

बार अध्यक्षमा वामपन्थी समूहका श्रेष्ठ विजयी

काठमाडौं : कानून व्यवसायीको छाता संस्था नेपाल बार एशोसिएशनको अध्यक्षमा वामपन्थी समूहका उम्मेदवार चण्डेश्वर श्र..

यसरी बाहिरिएको थियो प्रदेश २ मा एसइईको प्रश्नपत्र, घटनामा संलग्न ६ जना सार्वजनिक

यसरी बाहिरिएको थियो प्रदेश २ मा एसइईको प्रश्नपत्र, घटनामा संलग्न ६ जना सार्वजनिक

जनकपुरधाम : प्रदेश नम्बर २ मा माध्यमिक शिक्षा परीक्षा (एसइई) को प्रश्नपत्र बाहिरिएको घटनामा संलग्नलाई प्रहरीले..

प्रजापती कुम्हार संघको सातौं महाधिवेशन हुँदै, राज्यले विभेद गरेको गुनासो

प्रजापती कुम्हार संघको सातौं महाधिवेशन हुँदै, राज्यले विभेद गरेको गुनासो

काठमाडाैंः नेपाल प्रजापती कुम्हार संघले सातौं महाधिवेशन गर्ने भएको छ । मधेसी समुदायअन्तर्गत पर्ने यो जाति देशभ..

जनकपुर अञ्चल अस्पताल भ्रष्टाचारमा लिप्त, सम्बन्धित निकाय मौन  

जनकपुर अञ्चल अस्पताल भ्रष्टाचारमा लिप्त, सम्बन्धित निकाय मौन  

जनकपुरधाम : जनकपुर अञ्चल अस्पतालमा बिरामीलाई खाना, इन्धन र तलब भत्ता लगायतका विभिन्न शिर्षकमा छुट्टिएको रकम भ्..

सामाजिक सञ्जालमा २०७४ सालको प्रश्नपत्र राखेर विद्यार्थी झुक्याइँदै

सामाजिक सञ्जालमा २०७४ सालको प्रश्नपत्र राखेर विद्यार्थी झुक्याइँदै

जनकपुरधाम : देशभर माध्यमिक शिक्षा परीक्षा (एसइई) भइरहेका बेला प्रदेश नम्बर २ मा भने दुई दिनको परीक्षा स्थगित भ..

यसकारण हुन्छन् सुदूरपश्चिममा ठूला सवारी दुर्घटना

यसकारण हुन्छन् सुदूरपश्चिममा ठूला सवारी दुर्घटना

कैलाली : सुदूरपश्चिम प्रदेशमा सवारी दुर्घटनाका कारण वर्षेनी सयौं सर्वसाधारणले अकालकै ज्यान गुमाइरहेका छन् भने..