काठमाडौं : भारतीय प्रधानमन्त्री नरेन्द्र मोदीले अप्रिल ५ को राति ९ बजे देशभर दीप प्रज्वलन गर्न जनताहरुलाई आग्रह गरेका छन् ।
उनले लकडाउनका बेला ऐक्यवद्धता देखाउन रातको ९ बजे देशभरका जनतालाई आ-आफ्नो ठाउँबाट मैनबत्ती तथा बत्ती नभएको खण्डमा मोबाइलको ‘फ्ल्यास लाइट’ बाल्न आग्रह गरेका हुन् ।
उनले लकडाउनका बेला कोही पनि एक्लै नभएको सन्देश प्रवाह गर्न यस्तो आग्रह गरेको बताएका छन् । ९ मिनेटसम्म यस्तो गर्न आग्रह गरेका हुन् । उनले भने, ‘कृपया आइतबार तपाईको घरको बत्ति निभाउनुस्, घरको बालकोनीमा गएर ९ मिनेटसम्म क्यान्डिल, टर्च वा मोबाइल फ्ल्यास लाइट बाल्नुस् ।’
उनले कसैलाई पनि सडकमा ननिस्कन आग्रहसमेत गरेका छन् । कोरोना भाइरसविरुद्ध देशव्यापी अभियानको रुपमा शुक्रबार बिहान ९ बजे भिडिओ सन्देश मार्फत यस्तो आग्रह गरेका हुन् । उनले १ सय ३० करोड भारतीय जनताको एकीकृत शक्ति प्रदर्शनको लागि यस्तो आग्रह गरेको बताएका छन् ।
