कोरोना परिक्षण :प्रदेश २ मा ७९ जना मध्ये ३८ को निगेटिभ, ४१ को रिजल्ट आउन बाँकी



जनकपुरधाम : प्रदेश २ को जिल्लाहरुमा रहेका विभिन्न आइसोलेशन वार्डका कोरोना संक्रमित बिरामी मध्ये अहिलेसम्म ७९ जनाको थ्रोट स्वाब परिक्षण गरिएको छ ।

त्यसमध्ये ३८ जनाको रिजल्ट निगेटिभ आएको र ४१जनाको रिजल्ट आउन बाँकी रहेको छ । भारत लगायत अन्य देशबाट फर्केर नेपाल आएका कोरोना भाइरसका शंकास्पद व्यक्तिहरुलाई क्वारेन्टाइनमा राख्ने क्रम जारी रहेको छ । यो संख्या प्रदेश २ मा पनि बढ्दै गएको देखिएको छ ।

प्रदेश २ मा कोरोना भाइरस संक्रमणको आशंकामा समाचार तयार पार्दासम्म ७ सय ७१ जना शंकास्पद व्यक्तिलाई प्रदेशका विभिन्न जिल्लामा रहेका १ सय २७ वटा क्वारेन्टाइनमा राखिएको प्रदेश स्वास्थ्य निर्देशनालयका बरिष्ठ जनस्वास्थ्य प्रशासक विजय झाले जानकारी दिए ।

भारत लगायत अन्य देशबाट फर्केर नेपाल आएका ७ सय ७१ जना शंकास्पदलाई प्रदेश २ को विभिन्न जिल्लास्थित क्वारेन्टाइनमा राखिएको छ । प्रदेश स्वास्थ्य निर्देशनालयका अनुसार रौतहटमा ५ सय ३१ बेड संख्याको १६ वटा क्वारेन्टाइन बनाइएको छ । जहाँ १ सय ८२ जनालाई क्वारेन्टाइनमा र ४ जनालाई होम क्वारेन्टाइनमा राखिएको छ भने ९ बेड क्षमताको आईसोलेशन वार्डमा अहिले कुनै शंकास्पद बिरामी नरहेको बताइएको छ ।

त्यस्तै बारामा ३ सय ७९ बेड क्षमताको ११ वटा क्वारेन्टाइनमा अहिलेसम्म ४० जनालाई राखिएको छ । बारा जिल्लास्थित कलैया अस्पतालमा निर्माण गरिएको २० वटा आईसोलेशन बेडमा अहिले ५ जना कोरोनाका शंकास्पद बिरामीलाई राखिएको झाले जानकारी दिए । बारामा अहिले १६ जना होम क्वारेन्टाइनमा रहेका छन् ।

पर्सामा १ सय ७१ बेड क्षमताको ७ वटा क्वारेन्टाइन बनाइएको छ । त्यहाँ २१ जना क्वारेन्टाइनमा र ४ जना होम क्वारेन्टाइनमा रहेका छन् । पर्साको वीरगञ्जस्थित नारायणी अस्पतालमा बनाइएको ८ बेडको आईसोलेशन वार्डमा अहिले ४ जना शंकास्पद बिरामीलाई राखिएको छ ।

सप्तरीमा ४ सय ९५ बेड क्षमताको २९ वटा क्वारेन्टाइनमा अहिले २ सय २३ जनालाई निगरानीमा राखिएको छ । राजविराजस्थित गजेन्द्र नारायण सिंह सगरमाथा अस्पतालमा रहेको ९ वटा आईसोलेशन वार्डमा अहिले कुनै शंकास्पद बिरामी नरहेको उनले बताए ।

सिरहामा १ सय ३८ बेड क्षमताको १९ वटा क्वारेन्टाइनमा अहिले १ सय ४१ जना र होम क्वारेन्टाइनमा ७२ जना रहेका छन् । त्यस जिल्लामा १३ बेडको आईसोलेशन रहेकोमा त्यहाँ अहिलेसम्म कुनै पनि शंकास्पद बिरामीलाई राखिएको छैन् । धनुषामा ३ सय २६ बेड क्षमताको १६ वटा क्वारेन्टाइनमा अहिले ७४ जनालाई राखिएको झाले जानकारी दिए । यस जिल्लामा अहिले २० जनालाई होम क्वारेन्टाइनमा पठाइएको उनले बताए । धनुषामा १२ वटा आइशोलेसन रहेकोमा ५ जना शंकास्पद बिरामीलाई आईसोलेशनमा राखिएको छ ।

त्यस्तै महोत्तरीमा २ सय २५ बेड क्षमताको १२ वटा क्वारेन्टाइन बनाइएको छ । त्यहाँ अहिलेसम्म ४ सय ४९ जनालाई होम क्वारेन्टाइनमा पठाइएको छ भने क्वारेन्टाइनमा ३७ जनालाई राखिएको छ । महोत्तरीमा ८ वटा आईसोलेशन वार्ड निर्माण गरिएपनि अहिले ति आईसोलेशनमा कुनै पनि शंकास्पद बिरामी नआएको उनले बताए ।

सर्लाही जिल्लामा २ सय ४६ बेड क्षमताको १७ वटा क्वारेन्टाइनमा अहिले ५३ जना रहेका छन् भने ३२ जनालाई होम क्वारेन्टाइनमा पठाइएको उनले बताए । दुईवटा आईसोलेशन वार्ड निर्माण गरिएपनि अहिले ति आईसोलेशनमा कुनैपनि शंकास्पद बिरामी आएका छैनन् ।

त्यस्तै प्रादेशिक अस्पताल जनकपुरमा रहेका ४ जना बिरामीको थ्रोट स्वाब परिक्षण गरिएको र उनीहरूको रिपोर्ट आज साँझसम्म आउने झाले बताए । यता सप्तरीको राजविराजस्थित गजेन्द्र नारायण सिंह सगरमाथा अस्पतालको आइसोलेशनमा रहेका ९ जनाको थ्रोट स्वाब परिक्षणका लागि सुनसरीको धरानस्थित विपी कोइराला स्वास्थ्य विज्ञान प्रतिष्ठानमा पठाइएकोमा सबैको रिजल्ट निगेटिभ आएको निर्देशनालयले जनाएको छ ।

प्रदेश २ मा अहिले ७ सय ७१ जनालाई क्वारेन्टाइनमा राखिएको छ भने ९ सय २५ जना होम क्वारेन्टाइनमा रहेका छन् । प्रदेशभित्र २ हजार ५ सय १ बेडको १ सय २७ वटा क्वारेन्टाइन र ८१ वटा आईसोलेशन वार्डहरु निर्माण गरिएको छ । प्रदेशमा अहिले १४ जना आइसोलेशनमा रहेका छन् ।

प्रतिक्रिया दिनुहोस्