काठमाडौं : नेपाल कम्युनिष्ट पार्टी (नेकपा) र जनता समाजवादी पार्टी (जसपा) पार्टीका कार्यकर्ताबीच जम्काभेट भएको छ ।
मंगलबार एकअर्काविरुद्ध जाहेरी दर्ता गर्न सरकारी वकिलको कार्यालय काठमाडौं पुगेका दुवै पार्टीका कार्यकर्ताहरुको जम्काभेट भएको हो ।
वकिलको कार्यालय काठमाडौं अगाडि एक अर्काको समूहलाई देखेपछि एकअर्काविरुद्ध चर्को नाराबाजी समेत गरेका छन् ।
जनता समाजवादी पार्टीका कार्यकर्ताहरु तत्कालीन समाजवादी पार्टीका सांसद डा. सुरेन्द्र यादवलाई अपहरण गरेको भन्दै नेकपा सांसदद्वय महेश बस्नेत र किसान श्रेष्ठ तथा पूर्व आईजीपी सर्वेन्द्र खनालविरुद्ध जाहेरी लिएर सरकारी वकिलको कार्यालय गएका हुन् ।
भने नेकपाका कार्यकर्ता आफ्ना नेता कार्यकर्ता तथा नेताहरूलाई निराधार आरोप लगाएको भन्दै साइबर क्राइमको जाहेरी लिएर सरकारी वकिलको कार्यालय पुगेका थिए ।
प्रहरीले उजुरी लिन अस्वीकार गरेपछि दुवै पक्ष सरकारी वकिलको कार्यालय पुगेका हुन् ।
सरकारी वकिलको कार्यालयले पनि जाहेरी लिन अस्वीकार गरेको छ ।
