एजेन्सी : व्यापार विवादबारे चीनमा भएको पछिल्लो चरणको वार्ता सकिएसँगै अमेरिकी व्यापार विज्ञहरूले संयुक्त राज्य अमेरिका र चीनबीच व्यापार सम्बन्धमा सम्झौता गर्न प्रेरित देखिएको प्रतिक्रिया दिएका छन् ।
‘यो प्रष्ट भएको छ कि दुई पक्षबीच विस्तारै तर विधिसम्मत तरिकाले प्रगति भएको र मुलभूत एवम् सहायक बिषयहरूमा यस हप्ता पुनः वासिंटनमा वार्ता हुने प्रसंगले दुवै मुलुक व्यापार सम्झौताप्रति प्रतिवद्ध देखिएका छन्’, वासिंटनस्थित ‘इन्स्टिच्युट फर चाइना–अमेरिका स्टडिज’ का वरिष्ठ विचारक सौरभ गुप्ताले भने ।
गुप्ताले चिनियाँ समाचार संस्था सिन्ह्वालाई भने, ‘चीनमा भएको वार्तापछि लगत्तै आगामी हप्ता अमेरिकामा छलफल गर्ने सहमति गर्नु वार्ताकारको विवादलाई छिट्टै टुंगोमा पुर्याउने इमान्दार प्रयत्न हो र यसबाट दुबैपक्ष छलफलप्रति सकारात्मक बनेको बुझ्न सकिन्छ ।’
‘चीन र अमेरिका व्यापार विवादका कारण सन् २०१८ मा दुबैले अर्काको सामान आयातमा गरेको करबृद्धिबाट आर्थिक पीडामा परेको अनुभुति गरेका छन्’, बैंक अफ अमेरिका मेरिल लिन्चका विश्व अर्थतन्त्र अनुसन्धान कार्यक्रमका प्रमुख इथान ह्यारिसले भने ।
गुप्ताले भने, ‘दुबै पक्ष अझै वार्तामा संलग्न छन् तर यसले विशेष चर्चा नपाउनुमा अमेरिकामा केही सञ्चारमाध्यमले वार्तालाई छायाँमा पार्ने प्रयत्न गरेका कारण वार्तामा देखिएका सकारात्मक बिषयहरू चर्चामा आउन नसकेका हुनसक्छन् ।’
‘व्यापार वार्ताबारे मेरो दृष्टिकोण के छ भने अहिले तिनीहरू छिद्रान्वेशी अवस्थामा छन् । हामीले तिनीहरूलाई सम्भावित गल्ती हुनबाट बचाउन विभिन्न अवस्थामा सुक्ष्म अध्ययन गर्नुपर्छ । सम्भवतः मार्चको अन्तिमसम्म सम्झौता हुन्छ’, उनले भने ।
चीन तथा अमेरिकाबीच यस हप्ताको बिहीबार र शुक्रबार छैठौं चरणको उच्चस्तरीय आर्थिक तथा व्यापार परामर्श बैठक सम्पन्न भएको छ । चीन र अमेरिका दुबैले अर्को हप्ता वासिंटनमा भेट्ने सहमति भएको बताइसकेका छन् ।