काठमाडौं: सिंहदरवार भित्र अस्तव्यस्त रुपमा संचालित क्यान्टिन बन्द गरिएका छन्। प्रधानमन्त्री तथा मन्त्रिपरिषद्को कार्यालयले संघीय सचिवालय निर्माण तथा व्यवस्थापन कार्यालयलाई पत्र पठाएर विभिन्न मन्त्रालयमा रहेका क्यान्टिन बन्द गर्न निर्देशन दिएको थियो।
सो कार्यालयका सिनियर डिभिजन इन्जिनियर अमरबहादुर थापाले प्रधानमन्त्री तथा मन्त्रिपरिषद्को कार्यालयले परिपत्र गरेपछि सम्बन्धित मन्त्रालयमा पत्र पठाएर अस्तब्यस्त रुपमा खुलेका त्यस्ता क्यान्टिन बन्द गरिएको बताए। गत भदौ ३१ गते सिंहदरवार परिसर व्यवस्थापन सम्बन्धमा मुख्यसचिवको अध्यक्षतामा बसेको बैठकले गरेको २६ बुँदे निर्णयको १० नम्बर बुँदामा जथाभावी रुपमा खुलेका क्यान्टिन बन्द गराउने निर्णय गरिएको थियो।
सर्भिस सेन्टरमा रहेको ठूलो, संसद् सचिवालयमा रहेको अर्को र अन्य मन्त्रालयमा रहेका क्यान्टिनले मात्र सेवा पुग्न नसक्ने भएकाले थप २ वटा ठूला र व्यवस्थित क्यान्टिन सञ्चालन गर्ने तयारी गरिएकोे थापाले जानकारी दिए।
