काठमाडौं : सत्तारूढ दल नेपाल कम्युनिष्ट पार्टी (नेकपा)को स्थायी कमिटी बैठक आज (बुधबार)देखि फेरि शुरु हुने भएको छ । दुई पक्षबीचको विवादका कारण पटक–पटक स्थगित हुँदै आएको बैठक आजदेखि फेरी शुरु हुन लागेको हो ।
प्रधानमन्त्रीको सरकारी निवास बालुवाटारमा स्थायी कमिटी बैठक बस्नु अघि प्रधानमन्त्री एवं नेकपा अध्यक्ष्न केपी शर्मा ओली र अर्का कार्यकारी अध्यक्ष पुष्पकमल दाहाल ‘प्रचण्ड’बीच छलफल हुने भएको छ ।
मंगलबार दुई अध्यक्षबीच भएको छलफलले दलभित्र देखिएका सबैखाले विवाद समाधान गर्ने सहमति भएसँगै नेकपाको विवाद तत्कालाका लागि समाधान उन्मुख देखिएको छ ।
ओली र प्रचण्डबीच पाँच दिनदेखि गम्भीर छलफल भइरहेको छ । पार्टीको जारी स्थायी कमिटी बैठक नै स्थगित गरेर दुई अध्यक्षबीच छलफल गर्दै समस्या समाधानका उपाय खोजी भइरहेको थियो ।
हिजोको छलफलमा मंसिर चारको सहमतिलाई थप व्याख्या गरेर अघी बढ्न दुई अध्यक्ष सकारात्मक देखिएका छन् । तर, पार्टी र सरकारमा एक व्यक्ति एक पद लागू गराउनेबारेमा पनि छलफल चलिरहेको छ ।
हिजो दुई दलबीचको एकता पनि दुई अध्यक्षकै योजना र त्यागका आधारमा भएको थियो र आज देखिएको समस्या पनि दुई अध्यक्षले नै समाधान गर्ने गरी सहमति खोज्ने निर्णय भएको दुबै अध्यक्षको सचिवालयले जनाएको छ ।
नेकपा जारी स्थायी कमिटी बैठकमा बहुमत सदस्यले प्रधानमन्त्री र पार्टी अध्यक्ष दुवै पदबाट ओलीले राजीनामा दिनुपर्ने माग गरेका छन् । तर, यी दुवै पदबाट राजीनामा नदिने ओलीको अडान छ ।
यही अडानका बीच नेकपामा शक्तिसंघर्ष सुरु हुनुका साथै पार्टी फुटको संघारमा पुगेको थियो । तर पछिल्ला दिनमा अध्यक्षद्वयले सघन छलफल गरी सहमति खोज्दै पार्टीलाई फुटको संघारबाट जोगाउने लक्ष्यमा अघि बढेका हुन् ।
प्रकाशित : असार २४, २०७७
