एजेन्सी : आइभरीकोस्टका प्रधानमन्त्री एमाडोउ गन कोलाबालीको निधन भएको छ ।कोलाबालीलाई सत्तारुढ पार्टीले आउँदो अक्टोबरमा हुने राष्ट्रपति चुनावका लागि आफ्नो उम्मेदवार बनाउने घोषणा गरेका गरेका थिए ।
मन्त्रीपरिषद बैठकको क्रममा बिरामी परेका उनको लगत्तै निधन भएको हो । ६१ वर्षका कोलाबाली फ्रान्समा दुई महिना लगाएर मुटुको उपचार गरी हालै स्वदेश फर्किएका थिए ।
राष्ट्रपति एलासानी ओटाराले देश शोकमा रहेको बताएका छन् । कोलाबाली मन्त्रीपरिषदको साप्ताहिक बैठकको क्रममा बिरामी परेको र अस्पताल लगिएको उनले बताए । कोलाबालीको अस्पतालमै निधन भएको हो ।
उनको निधनले आउँदो अक्टोबरमा हुने भनिएको चुनावमा अनिश्चितता पैदा गरेको छ ।
सन् २०१२ मा कोलाबालीको मुटु प्रत्यारोपण भएको थियो । उनी गएको मे २ मा उपचारका लागि फ्रान्स गएका थिए र दुईमहिनापछि स्वदेश फर्किएका हुन् ।
गएको बिहीबार स्वदेश फर्किएका उनले देशको विकासलाई निरन्तरता दिने बताएका थिए ।
प्रकाशित : असार २५, २०७७