काठमाडौंः चीनले मे महिनाको आरम्भमा भारतको पूर्वी लद्दाख क्षेत्रमा अतिक्रमण गरेको स्वीकार गर्ने एक दस्तावेज भारतको रक्षा मन्त्रालयको वेबसाइटमा दुई दिन राखिएपछि हटाइएको छ । ‘चिनियाँ आक्रामकता वास्तविक नियन्त्रण रेखा क्षेत्रमा बढिरहेको छ र विशेष गरी गलवान उपत्यकामा मे ५ देखि बढेको छ । चिनियाँ पक्षले कुङराङ नाला, गोगरा र पांगोङ तालमा मे १७ र १८ मा अतिक्रमण गरेको थियो ।’
मन्त्रालयले आफ्नो वेबसाइटको ह्वाट्स न्यु सेक्सनमा एलएसीमा चिनियाँ आक्रामकता शीर्षकमा राखिएको थियो । उक्त दस्तावेजमा परिस्थिति साम्य बनाउन दुवै पक्षका सशस्त्र बलले धरातलीय स्तरमा अन्तर्क्रिरया गरिएको भनी लेखिएको छ । कोर्प्स कमान्डरहरूको फ्ल्याग मीटिङ जुन ६ मा भएको थियो । ‘तर जुन १५ मा दुई पक्षबीच हिंस्रक झडप भयो र दुवैतर्फ हताहती भयो ।’
‘पूर्वी लद्दाखमा चीनले एकपक्षीय रूपमा गरेको आक्रामकताका कारण परिस्थिति अझै संवेदनशील बनिरहेको छ र नजिकैबाट निगरानी गर्नुपर्नेछ । बदलिँदो परिस्थितिमा शीघ्र कारवाही पनि चलाउनुपर्नेछ,’ दस्तावेजमा लेखिएको छ ।
तर बिहीवार बिहान उक्त दस्तावेज वेबसाइटबाट गायब भयो र लिंकले पनि काम गरिरहेको छैन । उक्त दस्तावेज आफूले हेर्न नपाएको रक्षा मन्त्रालयका एक प्रवक्ताले बताए । मे महिनामा एलएसीमा तनाव शुरू भएदेखि पहिलोपटक भारतको आधिकारिक दस्तावेजमा चिनियाँ आक्रामकताको उल्लेख गरिएको हो ।
तर यसलाई रहस्यमयी तरिकाले गायब बनाइएको छ । विपक्षी दल कांग्रेसका नेता राहुल गान्धीले चिनियाँ अतिक्रमणका विषयमा मोदी सरकारले लगातार झूट बोलिरहेको बताउँदै आएका छन् । प्रधानमन्त्री नरेन्द्र मोदीले भारतको कुनै पनि भूमिमा चिनियाँ अतिक्रमण नभएको बयान दिइसकेका छन् ।
एजेन्सी
प्रकाशितस् साउन २२, २०७७