काठमाडौं : प्रधानमन्त्री केपी ओली नेतृत्वको सरकारले प्रदेश २ लाई ‘मधेस’ र जनकपुरधामलाई ‘राजधानी’ भनेको आरोपमा अनलाइनखबरमाथि कारवाही गर्न निर्देशन दिएको छ।
प्रधानमन्त्री तथा मन्त्रिपरिषद्को कार्यालयले सञ्चार तथा सूचना प्रविधि मन्त्रालयलाई पठाएको सर्कुलरमा ‘अनलाइनखबरले प्रदेश २ को राजधानीको नाम लेखेको सम्बन्धमा प्राथमिकतामा राखी कारवाही गर्न’ निर्देशन दिइएको छ।
प्रधानमन्त्री कार्यालयले कारबाही गर्ने पत्र चैत १ गते सञ्चार तथा सूचना प्रविधि मन्त्रालयमा पठाएको थियो।
सरकारको निर्देशनलाई अनलाइनखबरले समाचार बनाउँदै केपी ओली नेतृत्वको दुई तिहाइ बहुमतको सरकार सञ्चारमाध्यममा सेन्सरसिप लगाउन र मधेसमाथि समेत सेन्सरसिप लगाउन उद्दत रहेको आरोप लगाएको छ।
प्रधानमन्त्री कार्यालयले अनलाइनखबरमाथि प्राथमिकताका साथ कारवाही अघि बढाउन निर्देशन दिएको करिब एक सातापछि सञ्चार तथा सूचना प्रविधि मन्त्रालयले चैत ५ गते ‘आवश्यक कारवाहीका लागि’ भन्दै प्रेस काउन्सिललाई कारवाही गर्न निर्देशन दिएको छ।
प्रधानमन्त्री तथा मन्त्रिपरिषद् कार्यालयको पत्र उद्धृत गर्दै सञ्चार मन्त्रालयले अनलाइनखबरमाथि आवश्यक कारवाही गर्न प्रेस काउन्सिललाई निर्देशन दिएको छ।