सिन्धुपाल्चोक : जिल्लाको बाह्रबिसे नगरपालिका–७ को घुम्थाङ भिरबाट आएको पहिरोमा पुरिएर हालसम्म पाँच जनाको मृत्यु भएको छ भने २७ जना वेपत्ता भएका छन् ।
पहिरोमा परि मृत्यु हुनेमा भिरखर्कका तीन र नागपूजेका दुई जना रहेको इलाका प्रहरी कार्यालय बाह्रबिसेले जनाएको छ ।
नागपूजे गाउँस्थित बच्छलादेवी माविका शिक्षक बजिरसिंह भण्डारीले दिएको जानकारी अनुसार घुम्थाङ टुप्पोबाट आएको भीषण पहिरोले भिरखर्कमा रहेका २२ मध्ये २० घर लगेको छ । गाउँसो पहिरोले दुई सय मिटर तलको नागपुजे गाउँमा आठ घर पुरेको हो ।
शनिबार राति गएको पहिरोमा परि भिरखर्कमा नौ जना वेपत्ता छन् भने नागपूजेमा १८ जना वेपत्ता छन् ।
नेपाली सेना, सशस्त्र र जनपथ प्रहरीको संयुक्त टोलीले उद्धारकार्य जारी राखेको छ । मुख्य पहिरोसहित टोलैपिच्छे ससाना पहिरो गएकोले वेपत्ताको संख्या बढ्न सक्ने इलाका प्रहरी कार्यालय बाह्रबिसेका प्रहरी निरीक्षक नवराज न्यौपानेले बताए ।
सम्बन्धित समाचार
पहिरो प्रभावितलाई भेट्न सभामुख सापकोटा सिन्धुपाल्चोक प्रस्थान
प्रकाशित : भदौ २८, २०७७
