काठमाडौंः बिना अक्सिजन १० पटक सर्वोच्च शिखर सगरमाथाको आरोहण गरेका कीर्तिमानी आरोही आङरिता शेर्पाको राष्ट्रिय सम्मानका साथ अन्त्येष्टि गर्ने सरकारले निर्णय गरेको छ ।
आज (मंगलबार) बसेको मन्त्रिपरिषद् बैठकले शेर्पाको राष्ट्रिय सम्मानका साथ अन्त्येष्टि गर्ने र त्यसक्रममा भएको खर्च सरकारले व्यहोर्ने निर्णय भएको परराष्ट्र मन्त्री तथा सरकारका प्रवक्ता प्रदीप ज्ञवालीले जानकारी दिएका छन् । ‘हिम चितुवा’ उपनामले विश्व परिचित शेर्पाको सोमबार बिहान ७२ वर्षको उमेरमा निधन भएको थियो ।
त्यसैगरी मन्त्रिपरिषद् बैठकले निजामति कर्मचारीहरुको आधिकारिक ट्रेड युनियनको चुनाव रोक्ने निर्णय गरेको छ । मन्त्रिपरिषदको बैठकले असोज २४ गतेका लागि तय भएको निर्वाचन रोक्ने निर्णय गरेको कानूनमन्त्री डा. शिवमाया तुम्बाहाम्फेले बताएकी छिन् ।
सो युनियनले असोज २४ गते चुनाव गर्नुपर्ने प्रावधान रहेकोमा सरकारले हाललाई युनियनको निर्वाचनका सबै प्रक्रिया स्थगित गर्दै बैसाखसम्मका लागि कार्यकाल थप गरेको छ । यस्तै सरकारले इजरायलसँग केयर गिभरको रुपमा त्यहाँ काम गर्न जाने कामदार सम्बन्धी सम्झौता गर्न अख्तियारी दिने निर्णय पनि गरेको छ ।
प्रकाशितः ६ असोज, २०७७