काठमाडौं : नेपालमा कोरोना भाइरसको प्रकोप हरेक दिन उकालो लागि रहेको छ । स्वास्थ्य तथा जनसंख्या मन्त्रालयका अनुसार हालसम्म देशभर कोरोना संक्रमितको संख्या १ लाख ५ हजार ६ सय ८४ पुगेको छ ।
देशभर कोरोनाबाट ज्यान गुमाउनेको संख्या ६१४ छ । नेपाल विश्वभर कोरोना भाइरसको महामारीबाट प्रभावित भएको मुलुकको सूचीमा ४० औँ स्थानमा रहेको छ । वर्ल्डोमिटरको तथ्यांक अनुसार विश्वभर ४३ वटा देशमा कोरोना संक्रमितको संख्या एक लाखभन्दा बढी छ ।
संक्रमित संख्याका हिसाबले नेपाल ४०, युएई ४१, इजिप्ट ४२ र ओमान ४३ औँ स्थानमा छ । सबैभन्दा प्रभावित मुलुकको सूचीमा पहिलो स्थानमा अमेरिका छ । जहाँ कोरोना संक्रमितको संख्या ७९ लाख ४५ हजारभन्दा बढी छ भने २ लाख १९ हजारभन्दा बढीले ज्यान गुमाइसकेका छन् ।
दोस्रो स्थानमा रहेको छिमेकी मुलुक भारतमा संक्रमितको संख्या ७० लाख ५३ हजारभन्दा बढी छ भने १ लाख ८ हजारभन्दा बढीको मृत्यु भइसकेको छ । कोरोनाबाट सबैभन्दा बढी प्रभावित मुलुकको सूचीको तेस्रो स्थानमा ब्राजिल, चौथोमा रुस, पाँचौँमा कोलम्बिया, छैठौँमा स्पेन, सातौँमा अर्जेन्टिना, आठौँमा पेरु, नवौँमा मेक्सिको र दशौँ स्थानमा फ्रान्स छ ।
प्रकाशित : २५ असोज, २०७७
