काठमाडौं : नेपाल कम्युनिस्ट पार्टी (नेकपा)को यही कात्तिक १५ देखि १७ गतेसम्म काठमाडौँमा (जम्बो) केन्द्रीय कमिटीको बैठक बोलाएको छ ।
नेकपाको केन्द्रीय कमिटी बैठकमा ४३८ केन्द्रीय सदस्य र आठ जना स्थायी आमन्त्रित गरी ४४६ जना सहभागी हुनेछन् ।
नेकपाले बैठक आयोजना गर्दा अहिले कोभिड १९ बाट दैनिक दुई हजार जना काठमाडौँ उपत्यकामा सङ्क्रमित थपिरहेको अवस्था छ। यस्तो स्थितिमा केन्द्रीय कमिटी बैठक होला त भन्ने प्रश्न उठेको छ ।
गत भदौ २६ गतेको स्थायी कमिटी बैठकले पार्टीको आन्तरिक विवादलाई समाधान गर्दै मन्त्रिमण्डल पुनर्गठन, केन्द्रीय कमिटी बैठक र एकताको महाधिवेशन गर्ने निर्णय पारित गरेको थियो ।
त्यही निर्णयअनुसार मन्त्रिमण्डल पुनर्गठनको तयारी गरिरहेको नेकपा अहिले तेस्रो केन्द्रीय कमिटीको तयारीमा पनि जुट्नुपर्ने अवस्था छ ।
केन्द्रीय कमिटी बैठक हुन अब १२ दिन मात्र बाँकी छ । उक्त बैठक हुने, नहुने अझै निश्चित छैन । नेकपा केन्द्रीय कार्यालय सचिव ईश्वरी रिजालले बैठकको तयारी गरिए पनि यही अवस्थामा बैठक गर्न गाह्रो हुने बताए ।
‘नेताहरु स्थायी कमिटीको बैठकको म्याण्डेटअनुसार अघि बढिरहनुभएको छ । त्यसैअनुसार केन्द्रीय कमिटी बैठकको मिति तोकिएको छ,’ उनले भने,‘तर अहिले उपत्यकासहित देशभरि नै सङ्क्रमण बढिरहेकाले बैठक राख्न गाहो हुन्छ कि ?’
उनले बैठक सरेको निर्णय नभएकाले आवश्यक तयारी आफूहरुले गरेको बताए । केन्द्रीय कमिटी सदस्य ४४७ जनासहित सुरक्षाफौज र बैठक व्यवस्थापन गर्न कम्तीमा तीन हजार जनशक्ति आवश्यक पर्न जान्छ ।
मुलुकभरि एक लाख ३२ हजार २४६ र काठमाडौँमा मात्र ५५ हजार ३८७ जनामा सङ्क्रमण देखिएको छ । ‘बैठक सरेको छैन । शीर्ष नेताहरु भर्चुअल बैठक गर्ने कि भन्ने सोचमा हुनुहुन्छ,’ उनले भने, ‘स्थिति हेरेर बैठक बस्ने, नबस्ने टुङ्गो लाग्छ ।’
बैठक बस्ने निश्चित नभएको र स्थलको पनि यकिन गरिएको छैन । अघिल्लो वर्ष नेकपाको दोस्रो केन्द्रीय कमिटी बैठक गत माघमामा राष्ट्रियसभागृहमा बसेको थियो ।
नेकपा स्थायी कमिटी सदस्य मणि थापाले बैठकबारे औपचारिक जानकारी अझै आइनसकेको बताए । उनले कोभिडका कारणले बैठक के हुन्छ भन्न नसकिने जनाउँदै बैठकको देखिने गरी तयारीसमेत नभएको बताए ।
यता नेकपाको उच्च तहको निकाय सचिवालयमा अहिलेसम्म केन्द्रीय कमिटी बैठकबारे छलफलसमेत भएको छैन । त्यसो त सचिवालय बैठक नबसेको पनि एक महिना पुग्न लागेको छ । गएको असोज ४–६ यता सचिवालय बैठक बोलाइएको छैन ।
स्थायी कमिटी बैठक बस्दा नै बालुवाटारमा पाँच सयको हाराहारीमा मानिसको भेला भएकाले केन्द्रीय कमिटी बैठक सजिलो नभएको स्थायी कमिटीका एक सदस्य तर्क गर्छन् ।
