लन्डन : बेलायतमा कोभिड–१९ विरुद्धको खोप अभियान आज (मंगलबार)देखि आमनागरिकमा शुरु भएको छ ।
उत्तरी आयरल्यान्डकी ९० वर्षीया महिला फाइजरको कोरोना खोप लगाउने पहिलो व्यक्ति हुन् । कोभेन्ट्रीमा रहेको युनिभर्सिटी हस्पिटलमा ९० वर्षीया मार्गरेट कीननलाई पहिलो पटक कोरोना खोप दिइएको हो ।
अमेरिकी कम्पनी फाइजर र यसको जर्मन साझेदार बायोएनटेकले संयुक्त रुपमा विकास गरेको खोप पहिलो चरणमा बेलायतभरका ५० अस्पतालबाट दिन शुरु गरिएको हो ।
कोरोनाविरुद्धको खोप लगाएपछि प्रतिक्रिया दिँदै कीननले कोभिड–१९ विरुद्ध खोप लगाउने पहिलो व्यक्ति बन्न पाउनु नै मेरा लागि जन्मदिनको विशेष उपहार भएको बताइन् । उनी अर्को हप्ताबाट ९१ वर्षमा प्रवेश गर्दै छन् ।
बीबीसीका अनुसार मंगलबार कोरोनाविरुद्धको पहिलो डोजको खोप लगाएकी कीननले दोस्रो डोज २१ दिनपछि लगाउनेछिन् ।
स्कटल्यान्ड र वेल्सले पनि मंगलबारदेखि खोप वितरण शुरु गरेका छन् । बेलायतमा पहिलो चरणमा आउँदो सातासम्म ८ लाख डोज भ्याक्सिन दिइने छ । खोप लगाएका प्रत्येक मानिसलाई खोप कार्ड उपलब्ध गराइने भएको छ । स्वास्थमन्त्री म्याट हेनककले ट्वीट गर्दै सबै क्षेत्रमा खोप पुगिसकेको जनाएका छन् ।
अग्रपंक्तिमा काम गर्ने स्वास्थ्य कर्मचारी, ८० वर्ष नाघेका वृद्धवृद्धा र केयर होमका कामदार खोपको पहिलो प्राथमिकतामा छन् । राष्ट्रिय स्वास्थ्य सेवा, इंग्ल्यान्डका मेडिकल डाइरेक्टर प्रोफेसर स्टेफेन पोविसले यो बेलायतकै इतिहासमा जटिल र बृहत् खोप अभियान भएको बताएका छन् ।
प्रकाशित : मंसिर २३, २०७७
