काठमाडौं : प्रधानमन्त्री केपी शर्मा ओलीविरुद्ध नेकपाका कार्यकारी अध्यक्ष पुष्पकमल दाहाल ‘प्रचण्ड’ र वरिष्ठ नेता माधव नेपाल पक्षका सांसदहरुले अविश्वासको प्रस्ताव दर्ता गरेका छन् ।
सांसद भीम रावल र पम्फा भुसाललगायतले आइतबार प्रधानमन्त्री ओलीविरुद्ध संसद्को सचिवालयमा अविश्वासको प्रस्ताव दर्ता गराएका हुन् ।
यसअघि राष्ट्रपतिसमक्ष विशेष अधिवेशन आह्वान गर्दै दर्ता गराउन खोजेकोमा नमान्दा उक्त प्रस्तावलाई अविश्वासमा रुपान्तरण गरिएको प्रचण्ड–नेपाल समूहको दाबी छ ।
अविश्वासको प्रस्तावमा केही मन्त्रीहरूले पनि नाम लेखाएका छन् भने नाम लेखाएका मन्त्रीले राजीनामा दिन लागेका छन् ।
नेकपा अध्यक्ष प्रचण्ड र नेपाल पक्षका ९० भन्दा बढी सांसद रहेका बताइएको छ ।
संसद् सचिवालय स्रोतका अनुसार आइतबार साढे १० बजेपछि अविश्वासको प्रस्ताव दर्ता भएको हो ।
प्रधानमन्त्री ओलीको सिफारिसमा आइतबार राष्ट्रपति विद्यादेवी भण्डारीले प्रतिनिधिसभा विघटन गरिसकेकी छन् । राष्ट्रपति कार्यालयले विज्ञप्ति जारी गरी प्रतिनिधिसभा विघटन गरिएको जनाएको छ । विज्ञप्तिमा राष्ट्रपति भण्डारीले नेपालको संविधानको धारा ७६को उपधारा (१) र (७) तथा धारा ८५ बमोजिम प्रतिनिधिसभा विघटन गरिएको उल्लेख छ ।
प्रकाशित : पुस ५, २०७७
