काठमाडौं : सुदूरपश्चिम प्रदेशलाई ९ विकेटले पराजित गर्दै विभागीय टिम नेपाल पुलिस क्लब जितेको छ ।
प्रधानमन्त्री कप पुरुष राष्ट्रिय एकदिवसीय क्रिकेट प्रतियोगितामा पुलिस क्लबको पहिलो जित हो । १ सय ११ रनको सामान्य चुनौती पछ्याएको पुलिसले एक विकेटको क्षतिमा १७ ओभरमा लक्ष्य भेट्टाउदै जित निकालेको छ ।
१९८ बल बाँकी छँदै टीमले खेल जितेको हो । पुलिसका लागि ओपनर सुनिल धमला र कुशल भुर्तेलले अर्धशतक बनाए । सुनिल ५३ रन बनाएर आउट हुँदा कुशल ५१ रन बनाउँदै अविजित रहे । बलिङतर्फ सुदूरपश्चिमका हेमन्त धामीले एक विकेट लिए ।
त्यसअघि कीर्तिपुरको त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिमले ३३ ओभर १ बलमा अलआउट हुँदै जम्मा १ सय १० रन मात्रै बनाएको थियो । सुदूरपश्चिमका लागि खडक बोहोराले सर्वाधिक ४० रन बनाए ।
सन्जु धामी ३५, अरुण ऐर १३ र अर्जुज साउदले १० बनाउँदा अरु कसैले पनि दोहोरो अंकको रन जोड्न सकेनन् । पुलिसका दिपेन्द्र सिंह ऐरी र सागर ढकालले समान ४–४ विकेट लिएका थिए । १० ओभर बलिङ गरेर १८ रन खचिइ ४ विकेट लिएका सागर ढकाल प्लेयर अफ दि म्याच घोषित भएका छन् ।
जितसँगै नेपाल पुलिस क्लब समूह ‘बी’मा तालिकाको तेस्रो स्थानमा छ । दुई खेलबाट ४ अंक बनाएको बागमती प्रदेश तालिकाको पहिलो स्थानमा रहँदा २ अंक रहेको लुम्बिनी प्रदेश नेट रनरेटका आधारमा दोस्रो स्थानमा रहेको छ ।
प्रकाशित :७ माघ, २०७७
