काठमाडौं । बंगलादेशले भारतलाई रेम्डेसिभिरको १० हजार भाइल सहयोग गरेको छ । कोरोना महामारीसँग संघर्षरत भारतलाई बंगलादेशका लागि कोलकातास्थित सहायक उच्च कमिस्नरले भारतीय प्रतिनिधिलाई रेम्डेसिभिरको १० हजार भाइल सहयोग हस्तान्तरण गरेका हुन् ।
बंगलादेशले प्रेस विज्ञप्ति जारी गर्दै प्रधानमन्त्री शेख हसिनाको निर्देशनमा सहयोग सामाग्री भारत पठाइएको जनाएको छ । रेम्डेसिभिर कोभिड–१९ का गम्भीर बिरामीहरुको उपचारमा प्रयोग हुँदै आएको छ ।
यसअघि अत्यावश्यक सामाग्री पनि सहयोग गर्ने प्रस्ताव बंगलादेशले गरेको जानकारी बुधबार भारतको विदेश मन्त्रालयले दिएको थियो ।
भारतमा पठाइएको रेम्डेसिभिर बेक्सिम्कोले उत्पादन गरेको हो । बंगलादेशका ठूला औषधी कम्पनीमध्येको एक बेक्सिम्कोले आफ्नो देशमा कोभिशिल्ड खोप लैजानका लागि भारतको सेरम इन्स्टिच्युटसँग पनि साझेदारी गरेको छ ।
कोभिड–१९ महामारीले ग्रस्त भारतमा बंगलादेशले पठाएको यो पहिलो सहयोग हो । बंगलादेशले ठूला मात्रामा भिटामिन सी, डि, जिन्क सप्लिमेन्ट्स्, एन ९५ मास्क र कोभिड १९ का बिरामीहरुलाई आवश्यक औषधी पठाउने तयारी पनि गरिरहेको छ ।
बंगलादेश आफैं पनि कोरोनाको चपेटामा छ । यहाँ बिहीबार ४१ जनाले संक्रमणका कारण ज्यान गुमाएका छन् । यद्यपी, पछिल्लो आँकडाले देशमा कोरोनाको संक्रमण घट्दै गएको देखाउँछ ।