मोरङमा जेठ ११ गतेसम्म निषेधाज्ञा थप



विराटनगर । मोरङमा दोस्रो पटक निषेधाज्ञा थप गरिएको छ । जिल्ला प्रशासन कार्यालय मोरङले जेठ ११ गतेसम्म निषेधाज्ञा थप गरिएको मोरङका प्रमुख जिल्ला अधिकारी कोषहरि निरौलाले जानकारी दिए ।
यसअघि वैशाख २४ गतेदेखि जेठ १ गते राती १२ बजेसम्म निषेधाज्ञा जारी गरिएको थियो । कोरोना संक्रमणको फैलावट रोक्न आगामी जेठ ११ गते राति १२ बजेसम्मका लागि निषेधाज्ञालाई निरन्तरता दिने निर्णय भएको प्रमुख जिल्ला अधिकारी निरौलाले जानकारी दिए ।
निषेधाज्ञा अवधिमा सरकारले सञ्चालन गरेका बाहेक निजी क्षेत्रले सञ्चालन गरेको भौतिक निर्माणलाई रोक लगाइएको छ । भौतिक निर्माणमा प्रयोग हुने सामाग्रीको ढुवानीका लागि पनि विहान १० बजेसम्मको मात्रै समय तोकिएको छ ।
प्रशासनले उद्योग क्षेत्रमा पनि कडाई गर्ने निर्णय गरेको छ । यस अघि औद्योगिक मजदुरलाई घरबाट उद्योगसम्म जान छुट थियो । जेठ १ गतेबाट उद्योगकै आवास गृहमा रहेका मजदुर प्रयोग गरेर मात्रै उद्योग सञ्चालन गर्न दिने निर्णय भएको हो ।
बाहिरी मजदुरको आवत–जावत रोक्ने निर्णय भएको उनले बताए । प्रशासनले खाद्यान्य सागसब्जी, दूधलगायत अत्यावश्यक बस्तुको विक्रीका लागि विहान १० बजेसम्मको समय तोकेको छ ।

प्रतिक्रिया दिनुहोस्