मन्त्रिपरिषद् विस्तारबारे माओवादी केन्द्रको बैठकमा छलफलै भएन



काठमाडौं । नेकपा (माओवादी) केन्द्रले पार्टीभित्रको निर्वाचन गर्ने प्रयोजनका लागि निर्वाचन आयोग गठन गरेको छ । मंगलबार बसेको स्थायी समिति बैठकले विष्णुपुकार श्रेष्ठको संयोजकत्वमा २२ सदस्य रहेको आयोग गठन गरेको हो ।
बैठकले पार्टीको स्थानीयदेखि केन्द्रसम्म निर्वाचन गराउन नियमावली र निर्देशिका बनाउने जिम्मा आयोगलाई दिएको छ । त्यस्तै पार्टीको विधानपनि परिमार्जन गरेर पेश गर्नेगरि पारित गरेको छ ।
‘विधानमा केही थपघट र परिमार्जन भएको छ,’ बैठक पछि पत्रकारसँग कुरा गर्दै प्रवक्ता कृष्णबहादुर महराले भने, ‘अझै भाषमा थपघट गर्नुपर्ने भएकाले त्यसलाई छिटो सक्ने र केही परिमार्जन गरेर आगामी केन्द्रीय समिति वा राष्ट्रिय सम्मेलनबाट अनुमोदन गर्ने गरि पारित गरियो ।’
बैठकले विभिन्न ४५ पार्टीबाट विद्रोह गरी आएकाहरूलाई समायोजन गर्नेबारे गठित कार्यदलले बुझाएको प्रतिवेदन पनि पारित गरेको छ । बैठकमा मन्त्रिपरिषद् विस्तारबारे भने कुनै छलफल भएन ।
महराले मन्त्रिपरिषद् विस्तारबारे कुनै छलफल नभएको जानकारी दिए । ‘मन्त्रिपरिषदबारे यो बैठकमा केही कुरा भएन’, उनले भने, ‘संसदको गतिरोध हटाउन प्रतिपक्षी एमालेसँग संवाद बढाउने काम सभामुखले गरिरहनु भएको छ । संसदको गतिरोध हटाएर सहमतिमा अघि बढ्नुपर्छ ।’

प्रतिक्रिया दिनुहोस्