महिला तथा पुरुष एनभीए क्लब भलिबल च्याम्पियनसिप असोज १० देखि



काठमाडौं । नेपाल भलिबल संघ (एनभीए)को आयोजनामा ‘छैठौं राष्ट्रिय महिला तथा पुरुष एनभीए क्लब भलिबल च्याम्पियनसिप’ असोज १० देखि १६ गतेसम्म काठमाडौंमा हुने भएको छ ।
एनभीएले बुधबार एक पत्रकार सम्मेलन गर्दै प्रतियोगिता असोज १० देखि १६ गते सम्म हुने र यसपाली पुरस्कार राशी पनि वृद्धि भएको जानकारी दिएको छ ।
आसन्न प्रतियोगिताको विजेताले ४ लाख, उपविजेतालाई २ लाख र तेस्रो हुनेले १ लाख रूपैयाँ प्राप्त गर्ने एनभीएले बताएको हो । प्रतियोगिताको आगामी संस्करणमा पुरुषतर्फ १२ र महिलातर्फ ७ टिमको सहभागिता रहने आयोजकले बताएको छ ।
तीन विभागीय टोलीहरू– नेपाल पुलिस क्लब, त्रिभुवन आर्मी र एपीएफसँगै टिपटप हेल्प नेपाल, नेपाल स्पोर्ट्स क्लब, ढोरपाटन स्पोर्ट्स क्लब, गण्डकी प्रदेश, गल्कोट स्पोर्ट्स क्लब, मणिमुकुन्द भलिबल क्लब, बागमती प्रदेश, दावाली मिलन क्लब, नयाँ बजार सामाजिक क्लब र कर्णाली प्रदेशले पुरुषतर्फ प्रतिस्पर्धा गर्ने आयोजकले बताएको छ ।
यस्तै, महिलातर्फ पनि तीन विभागीय– आर्मी, पुलिस र एपीएफसँगै होङगान्जी न्यू डाइमन्ड क्लब, ढोरपाटन स्पोर्ट्स क्लब, प्रदेश २ र एभरेस्ट भलिबल क्लबले प्रतिस्पर्धा गर्नेछन् ।
यो प्रतियोगिताको शीर्ष पुरुष ७ र महिला ५ टोली चैतमा हुने छैठौं राष्ट्रिय महिला तथा पुरुष एनभीए क्लब भलिबल लिगका लागि छनोट हुनेसमेत आयोजकले बताएको छ ।
च्याम्पियनसिपको सर्वोत्कृष्ट हुने महिला–पुरुष दुवैतर्फका खेलाडीले २५÷२५ हजार रूपैयाँ प्राप्त गर्नेछन् । साथै विधागत उत्कृष्ट सर्भर, लिब्रो, ब्लकर, स्पाइकर, सेटर र प्रशिक्षकले जनही १०÷१० हजार प्राप्त गर्ने संघका महासचिव जितेन्द्र बहादुर चन्दले जानकारी दिए ।

प्रतिक्रिया दिनुहोस्