पद धरापमा रहेपनि प्रदेश १ का मुख्यमन्त्रीले गरे दोस्रो पटक मन्त्रिपरिषद् विस्तार



विराटनगर । प्रदेश १ को मन्त्रिपरिषद् दोस्रोपटक विस्तार भएको छ । बुधबार मुख्यमन्त्री भीमप्रसाद आचार्यले ५ जना मन्त्री नियुक्त गरेका हुन् । थपिएका मन्त्रीहरूमा दुईजना मन्त्री र तीनजना राज्यमन्त्री छन् ।
आर्थिक मामिला तथा योजना मन्त्रीमा तुलसीप्रसाद न्यौपाने र भूमि व्यवस्था कृषि तथा सहकारी मन्त्रीमा हिराकुमार थापालाई नियुक्त गरिएको छ । यस्तै उद्योग पर्यटन वन तथा वातावरण राज्यमन्त्रीमा उत्तमकुमार बस्नेत, भूमि व्यवस्था तथा कृषि तथा सहकारी राज्यमन्त्रीमा ज्ञानेश्वर राजवंशी र आन्तरिक मामिला तथा कानुन राज्यमन्त्रीमा लिलाबल्लभ घिमिरे नियुक्त भएका छन् । नवनियुक्त मन्त्री तथा राज्यमन्त्रीहरूलाई प्रदेश १ का प्रदेश प्रमुख सोमनाथ अधिकारी प्यासीले पद तथा गोपनियताको शपथ ग्रहण गराएका थिए । यसअघि मुख्यमन्त्री भीम आचार्यले सामाजिक विकास मन्त्रीमा बलबहादुर साम्सोहाङ र उद्योग पर्यटन वन तथा वातावरण मन्त्रीमा लक्षुमन तिवारीलाई नियुक्त गरेका थिए । नयाँ मन्त्री थपिएसँगै प्रदेश १ को मन्त्रिपरिषद् ८ जनाको भएको छ ।
प्रदेश सरकारले नयाँ मन्त्री थप गरेर मन्त्रिपरिषद् विस्तार गरिरहेको बेला विपक्षी गठबन्धनमा आबद्ध दलहरूले भने मुख्यमन्त्री आचार्य नेतृत्वको सरकारलाई चाँडो सत्ता छाड्न दबाब दिने तयारी गरिरहेका छन् । विपक्षी गठबन्धनको बुधबार बसेको बैठकले मुख्यमन्त्रीले विश्वासको मत लिनुपर्ने समय असोज ८ गते सम्म मात्रै भएकाले असोज ८ गते सम्ममा विश्वासको मत लिन वा राजीनामा दिन दबाब दिने निर्णय गरेको छ ।
निर्वाचन आयोगले नेकपा एमाले विभाजन भएको औपचारिक पत्र भदौ ९ गते प्रदान गरेकोले संघ र प्रदेशमा सोही मितिबाट दल विभाजन भएको गणना हुने गठबन्धनको दावी छ । राष्ट्रिय पार्टी विभाजनको विषयलाई प्रदेशसभा संसदीय दल विभाजनको अर्थमा लगाएर सत्ता लम्ब्याउने प्रयास भएको र त्यस्तो अवस्था आए संविधान प्रतिकुल हुने ठहर गठबन्धनको बैठकले गरेको छ ।
सरकार गठन भएको ३० दिनभित्र विश्वासको मत लिनुपर्ने बाध्यकारी व्यवस्था छ । विपक्षी गठबन्धनको बैठकले असोज ८ गतेभित्र विश्वासको मत लिने प्रक्रिया अगाडि नबढाए वा राजीनामा गरी सरकार गठनका लागि मार्गप्रशस्त नगरे अविश्वासको प्रस्ताव लैजाने निर्णय गरेको नेकपा माओवादी केन्द्र संसदीय दलका नेता इन्द्रबहादुर आङ्बोले जानकारी दिए ।
यता सरकारले भने असोज २२ गते विश्वासको मत लिने उद्देश्यले प्रदेशसभा बैठक आह्वान गरेको छ । प्रदेशसभामा हाल कायम रहेका ९२ सांसदमध्ये सभामुखसहित नेकपा एमालेका ४१, नेपाली काँग्रेसका २१, नेकपा माओवादी केन्द्रका १५, नेकपा एकीकृत समाजवादीका १०, जनता समाजवादी पार्टीका ३, संघीय लोकतान्त्रिक राष्ट्रिय मञ्चका १ र राप्रपाका १ जना सांसद छन् । नेकपा एमालेका ५१ जना सांसदमध्ये १० जना सांसद नेकपा एकीकृत समाजवादीमा गएसँगै एमाले नेतृत्वको सरकार अल्पमतमा परेको छ । सरकार अल्पमतमा परेपनि प्रदेशसभाबाट विश्वासको मत लिने मुख्यमन्त्री आचार्यले तयारी गरिरहेका छन् ।
प्रदेश १ मा विश्वासको मत प्राप्त गर्न ४७ जना सांसदको समर्थन आवश्यक पर्छ । तर, नेकपा एकीकृत समाजवादीका १० जना सांसदले मुख्यमन्त्रीलाई दिएको समर्थन फिर्ता लिएको औपचारिक पत्र प्रदेशसभा सचिवालयमा दर्ता गरिसकेकाले सरकार अल्पमतमा परिसकेको छ ।

प्रतिक्रिया दिनुहोस्