हुम्लामा जसपाको संगठन सदृढीकरण अभियान सुरु



सिमकोट । जनता समाजवादी पार्टीले चार महिने संगठन सदृढीकरण तथा जनजागरण कार्यक्रम जिल्लामा सुरु गरेको छ । संगठन विस्तार र कार्यकर्ता भेटघाट कार्यक्रम जिल्लाका सबै गाउँपालिकामा सञ्चालन गर्ने गरी अभियानको थालनी गरिएको जसपा अध्यक्ष धर्मराज बोहराले जानकारी दिए ।
उनका अनुसार अभियान सञ्चालनका लागि जिल्लामा अगुवा कार्यकर्ता भेला र प्रशिक्षण कार्यक्रम सुरु भएको छ । प्रशिक्षणमा अगुवा कार्यकर्ताहरु सहभागी भएको र अब चाँडै गाउँ–गाउँमा परिचालन हुने उनले बताए ।
प्रशिक्षण कार्यक्रममा केन्द्रीय सदस्य वीरजंग शाही, बलिराज शाहीलगायतका नेताहरुको सहभागिता थियो । कार्यक्रमस्थल जिल्ला समन्वय समितिको सभाहलमा छिर्नुअघि कार्यकर्ताहरुले सिमकोट बजारमा जुलुस प्रदर्शन गरेका थिए ।
भदौ १ गतेबाट मंसिर महिनासम्म सञ्चालन हुने सो अभियान हुम्लामा भने असोज पहिलो हप्ताबाट सुरु भएको छ । अभियानको थालनी जिल्लाको उत्तरी क्षेत्रको नाम्खा गाउँपालिकाबाट भएको हो । अभियान दसैँअगाडि सिमकोटको खार्पुनाथ गाउँपालिकामा सञ्चालन गरिने अध्यक्ष बोहराले जानकारी दिए । उनका अनुसार दसैँपछि दक्षिणी क्षेत्रका चार वटा गाउँपालिका सर्केगार्ड, चंखेली, अदानचुली र ताँजाकोटमा अभियान सञ्चालन हुनेछ ।

प्रतिक्रिया दिनुहोस्