प्रदेश २ मा संसदीय दलको नेता छान्न लोसपाको बैठक आइतबार



जनकपुरधाम । जनता समाजवादी पार्टी (जसपा) बाट विभाजित भएर नयाँ दर्ता गरिएको लोकतान्त्रिक समाजवादी पार्टी (लोसपा) प्रदेश २ संसदीय दलको बैठक बोलाइएको छ ।
आइतबार बोलाइएको बैठकमा अध्यक्ष महन्थ ठाकुर पनि सहभागी हुने छन् । बैठकले संसदीय दलका नेता चयन गर्नेछ । त्यस्तै समसामयिक राजनीतिक परिस्थितिबारेको पनि बैठकमा छलफल हुनेछ ।
प्रदेश २ का जसपाका ५५ सांसदमध्ये १६ सांसदले लोसपा रोजेका छन् । संसदीय दलको नेतृत्वको लागि जीतेन्द्र सोनल, सरिता साह र उपेन्द्र महतो दौडधुपमा छन् ।
यसअघि सोनल तत्कालीन जसपा संसदीय दलका नेता थिए । ठाकुर पक्षमा रहेको भन्दै उनलाई प्रदेश सरकारले भौतिक पूर्वाधार विकास मन्त्रीबाट वर्खास्त गरेको थियो । लोसपाको संसदीय दलमा उनको सम्भावना बलियो देखिएको छ ।
लोसपा गठन भएपछि संसदीय दलका नेताको आकांक्षी बढेको र उनीहरू लोकतान्त्रिक प्रक्रियाबाट दलका नेता चयन गर्नुपर्ने आवाज उठाएपछि विधान बनाइएको छ । सहमति नजुटे विधानअनुसार चुनावबाटै दलका नेता चयन गरिने नेताहरूले बताएका छन् ।

प्रतिक्रिया दिनुहोस्