प्रधानमन्त्री र प्रधानन्यायाधीशले लोकतन्त्रलाई मास्ने काम गरे : शेखर कोइराला



विराटनगर । नेपाली कांग्रेसका नेता डा. शेखर कोइरालाले प्रधानमन्त्री एवं पार्टी सभापति शेरबहादुर देउवाका कारण कांग्रेस कमजोर बन्दै गएको बताएका छन् ।
विराटनगर–४ इक्राहीमा मंगलबार नोना कोइराला स्मृति प्रतिष्ठान नेपालको भवन उद्घाटन गर्दै कांग्रेसका केन्द्रीय सदस्य कोइरालाले प्रधानमन्त्री देउवा र प्रधानन्यायाधीश मिलेर लोकतन्त्रलाई मास्ने काम गरेको आरोप लगाए ।
कोइरालाले प्रधानमन्त्री र प्रधानन्यायाधीशको गठबन्धनबाट मन्त्री नियुक्त गर्नु नै लोकतन्त्र मास्ने बाटो भएको टिप्पणी गरे ।
उद्योग वाणिज्य तथा आपूति मन्त्री गजेन्द्रबहादुर हमालले मन्त्री नियुक्तको विवादमा नैतिकता प्रस्तुत गर्दै राजिनामा दिए झैं कांग्रेस सभापतिले पार्टीको हकमा नैतिकता देखाउन नसकेको आरोप उनले लगाए ।
प्रदेश १ मा कांग्रेसको सरकार बन्नुपर्नेमा जोड दिएका नेता कोइरालाले प्रधानमन्त्री देउवाकै कारण सत्ताको बागडोर अन्य दलमा गइरहेको बताए ।
बागमती प्रदेशमा एकीकृत समाजवादीलाई सत्ता बाँडिए पनि प्रदेश १ मा कांग्रेसको पकड बनाउन सक्नुपर्ने कोइरालाले जोड दिए । पछिल्लो समय राजनीतिमा संस्कारको अभाव हुँदै गएको बताएका कोइरालाले प्रदेश १ मा कांग्रेसले नै सत्ताको जिम्मेवारी लिनुपर्ने अडान लिए ।
उनले भने, ‘पार्टीलाई थप सशक्त बनाउन प्रदेश १ मा कांग्रेसले सरकारको नेतृत्व गर्नुपर्छ । तर, यसका लागि समेत सभापति बाधक भइरहनु भएको छ । उहाँ प्रदेश १ मा कांग्रेसको सरकार चाहिरहनु भएको छैन । उहाँ प्रस्ट कांग्रेस बाहिरलाई सरकार दिन खोजिरहनु भएको छ ।’
जापानी दूतावासको करिब १२ लाख रुपैयाँको सहयोगमा भवन निर्माण भएको हो । २०७४ सालमा शिलान्यास गरिएको भवन निर्माण कार्य बाढीका कारण केही समय अवरुद्ध भएको थियो । हाल एक तल्लाको भवनलाई आगामी दिनमा ३ तल्लासम्म बनाउने लक्ष्य राखिएको छ । प्रतिष्ठान २०६४ सालमा स्थापना भएको हो ।

प्रतिक्रिया दिनुहोस्