साफ च्याम्पियनसिप २०२१ को उपाधि जित्न नेपाल असफल



काठमाडौं । साफ च्याम्पियनसिप २०२१ को उपाधि जितेर नयाँ इतिहास रच्ने नेपालको सपना अधुरो भएको छ । माल्दिभ्समा शनिबार राति सम्पन्न फाइनलमा नेपाललाई ३–० गोलअन्तरले पराजित गर्दै भारत दक्षिण एसियाको च्याम्पियन बन्न सफल भएको छ ।
पहिलो हाफमा नेपालले भारतलाई गोलरहित बराबरीमा रोकेपनि दोस्रो हाफको सुरुवातमै भारतले दुई मिनेटमा दुई गोल गरेको थियो । ४८औं मिनेटमा भारतका कप्तान सुनिल क्षेत्रीले हेडर गोल गर्दै भारतलाई अग्रता दिलाए । लगत्तै २ मिनेटपछि सुरेश सिंहले डी बक्सभित्रबाट गोल गर्दै भारतको अग्रता दोब्बर पारे । यस्तै अतिरिक्त समयमा सहल अहमदले गोल गर्दै भारतको जित पक्का गरे । यो सँगै पहिलोपल्ट साफको फाइनल पुगेको नेपालको उपाधि जित्ने सपना समेत चकनाचुर भयो । योसँगै भारतले ८ पटक साफको उपाधि जितिसकेको छ ।
पहिलो हाफमा नेपालले सुरुवातमा नै गोलको अवसर गुमाएको थियो । सुजल श्रेष्ठको क्रसलाई नवयुग श्रेष्ठले जाली चुमाउन सकेनन् । उता, भारतको निरन्तर आक्रमणलाई गोलकिपर किरण चेम्जोङले बचाऊ गरेका थिए ।
त्यसबाहेक माल्दिभ्सले दुई, बगंलादेश, श्रीलंका र अफगानिस्तानले एक–एक पटक साफको उपाधि जितेका छन् ।
यसअघि नेपाल र भारतबीचबीच भएका २२ खेलमा भारतले १५ मा जीत हासिल गरेको छ भने नेपालले मात्र २ खेलमा जीत हासिल गरेको छ । ५ खेल बराबरीमा सकिएको छ । नेपालले पछिल्लो पटक भारतलाई सन् २०१३ मा साफमा २–१ ले हराएको थियो । त्यसपछि सन् १९९३ मा ढाकामा नेपाल पेनाल्टीमा विजयी भएको थियो ।
योसँगै अब्दुल्लाह अलमुताइरीको नेपालको मुख्य प्रशिक्षकका रुपमा अन्तिम खेलमा वियोगान्त अन्त्य भएको छ । यसअघि नै फाइनल खेल आफ्नो लागि अन्तिम हुने बताएका अलमुताइरी शनिबारको खेलमा निलम्बनका कारण टचलाइनमा उपस्थित हुन पाएका थिएनन् ।

प्रतिक्रिया दिनुहोस्