बझाङमा २४ जना बेपत्ता, झापाका ४० घर डुबानमा



बझाङ । बझाङमा पहिरोमा परेर २४ जना बेपत्ता भएका छन् । सोमबार रातिको पहिरोमा परेर थलारा गाउँपालिका–४ डिक्लामा २४ जना हराइरहेका छन् । गाउँबाट एक किलोमिटर माथि रहेको ढोगदिना डाँडा भन्ने ठाँउबाट पहिरो खस्दा सात घर पहिरोमा पुरिएको स्थानीय प्रहरीले जनाएको छ ।
बेपत्ता हुनेमा गगने सार्कीका एकै परिवारका १८ जना र नरे पार्कीको परिवारका ६ जना रहेका छन् । पहिरोका कारण तल्लो डिक्ला र माथिल्लो डिक्ला गाउँका स्थानीय त्रिभुवन मावि महेन्द्रधारमा अस्थायी रुपमा आश्रय लिइरहेका छन् । पूरा गाउँ पहिरोको जोखिममा परेपछि सय भन्दा बढी परिवार विस्थापित भई आफन्त र नजिकैको विद्यालयमा बसिरहेका छन् ।
पहिरो पीडितको उद्वारमा खटिएको प्रहरी टोली डिक्ला पुगे पनि पहिरो खसिरहेका कारण उद्धार हुन नसकेको जानकारी प्राप्त भएको जिल्ला प्रहरी कार्यालय बझाङका प्रमुख डिएसपी रुपक खड्काले बताए ।
यस्तै आइतबार रातिबाट सुरु भएको अविरल वर्षाका कारण जिल्लाभर जनजीवन अस्तव्यस्त भएको छ । पहिरोले जयपृथ्वी नगरपालिका– १ पिमी गाउँमा मात्रै ६० परिवार विस्थापित भएको स्थानीयले बताएका छन् ।
यस्तै लगातारको वर्षासँगै सदरमुकाम नजिक भएर बग्ने डुङग्री खोलामा आएको बाढीले डुङग्री बजार र लेकी जोड्ने झोलुङगे पुल बगाएको छ । पुल नजिक रहेका ५ वटा पक्की घर पनि बगाएको र बजारका अरु घरहरु पनि जोखिममा परेको प्रहरीले जनाएको छ ।
अविरल वर्षा र पहिरोले सुदूरपश्चिमका धेरै पहाडी जिल्लामा सञ्चार सेवा अवरुद्ध भएको छ । बाढीले सडक अवरुद्ध भएको र नेटवर्क नहुँदा समयमै खबर नपाएकोले उद्वारमा समस्या भइरहेको जिल्ला प्रहरी कार्यालय बझाङका प्रमुख डिएसपी रुपक खड्काले बताए ।
पहिरोले जिल्ला जोड्ने जयपृथ्वी राजमार्ग लगायत जिल्लाभित्रका सबै ग्रामीण सडकहरु अवरुद्ध भएका छन् । सोमबारदेखि नेपाल टेलिकमको संचार सेवा पूर्ण रुपमा अवरुद्ध छ भने एनसेलको सेवा आंशिक रुपमा सूचारु छ । ठाउँठाउँमा पोल ढलेका कारण जिल्लाभरको विद्युत सेवा अवरुद्ध छ । सदरमुकाम चैनपुर लगायत दर्जन बढी ठाँउको खानेपानी सेवा पनि अवरुद्ध भएको बताइएको छ ।
जिल्लाभर मोबाइल सेवा पनि अवरुद्ध भएकाले कुन ठाउँमा कति क्षति भयो भन्ने यकिन विवरण नआइसकेको प्रमुख जिल्ला अधिकारी मोहन अधिकारीले बताए ।
यस्तै, अविरल वर्षासँगै कनकाई नदीमा आएको बाढी पस्दा दक्षिण झापाको गौरीगञ्ज गाउँपालिकाको एउटा बस्ती नै डुबेको छ ।
जिल्ला प्रहरी कार्यालय झापाका अनुसार गौरीगञ्ज १ जोडा होकलबाडीका ४० घर डुबानमा परेका हुन् । प्रहरीले डुबानमा परेका स्थानीयलाई सुरक्षित स्थानतिर सार्ने प्रक्रिया सुरु गरेको जनाएको छ । तर, तिब्र वर्षा र बाढीका कारण तत्काल उद्वार टोलीलाई घटनास्थलमा खटाउन नसकिएको जिल्ला प्रहरी कार्यालय झापाका प्रवक्ता डीएसपी राकेश थापाले जनाए ।

झापामा आएको बाढी


प्रहरीका अनुसार स्थानीयले प्रयोग गर्ने एउटा नाउसमेत खोलाले बगाएपछि उद्वारमा समस्या भएको बताइएको छ । दावाँबाट कनकाई खोलाको बाढी पसेपछि उक्त बस्ती टापु जस्तै बनेको स्थानीयको भनाइ छ ।
यता, बैतडीको सिगास गाउँपालिकास्थित ढुंगाड बस्तीभित्र सेती नदीको बाढी पसेपछि ६० जना जति स्थानीयहरु उद्वारको पर्खाइमा बसिरहेका छन् । सोमबार राति १० बजेदेखि नै उद्वारको पर्खाइमा बसेका उनीहरुले जतिसक्दो छिटो उद्धार गरिदिन आग्रह गरेका छन् ।
नदीले गाउँको जमिन कटान गरेर ढुंगाडमा एउटा टापु नै बनाएको छ । जुन टापु जुन सुकै बेला पनि बगाउन सक्ने भन्दै स्थानीयहरु चिन्तित बनेका छन् ।

प्रतिक्रिया दिनुहोस्