विश्वकप क्रिकेटमा आज अष्ट्रेलिया र श्रीलंका भिड्दै



काठमाडौँ : आईसीसी टी–ट्वान्टी विश्वकप क्रिकेटमा आज अष्ट्रेलिया र श्रीलंका भिड्दै छन् । दुबईमा आज राति ७:४५ बजे सुरु हुने खेलमा यी दुई टिम भिड्न लागेका हुन् । आज दुबै टिम दोस्रो जितको खोजीमा हुने छन् । त्यसैले दुई टिमबीचको खेल रोमान्चक हुने अनुमान गरिएको छ। पहिलो खेलमा अष्ट्रेलियाले दक्षिण अफ्रीकालाई ५ विकेटले हराएको थियो।

अष्ट्रेलिया त्यस जितलाई निरन्तरता दिन चाहन्छ । श्रीलंकाले पहिलो खेलमा बंगलादेशलाई ५ विकेटले नै हराएको थियो । श्रीलंका पनि आफ्नो जितलाई निरन्तरता दिने योजनामा हुनेछ । सुपर १२ को समूह १ को अष्ट्रेलिया २ अंक जोडेर तेस्रो स्थानमा रहेको छ । श्रीलंका २ अंक जोडेर दोस्रो स्थानमा रहेको छ । यी दुई देशबीच कुल १६ टि-२० आई खेल भएका छन् । जसमा दुबै टोलीले ८–८ मा जित निकालेका छन् । पछिल्ला चार खेलमा अष्ट्रेलियाले लगातार जित निकालेको छ ।

श्रीलंकाले २०१७ मा अष्ट्रेलियालाई अन्तिम पटक २ विकेटले पराजित गरेको थियो । चार वर्षको अन्तरमा श्रीलंका टोलीको स्तरमा धेरै परिवर्त आएको छ । अहिले पहिला भन्दा बढी खस्केको छ । टि-२० विश्वकपमा यी दुई देशबीच कुल ३ खेल भएका छन् । जसमा अष्ट्रेलिया २ खेलमा जित र १ खेलमा पराजित भएको छ ।

प्रतिक्रिया दिनुहोस्