कांग्रेस कपिलवस्तुको प्रतिनिधि सभा क्षेत्रीय निर्वाचन बुधबार



कपिलवस्तु । कांग्रेस कपिलवस्तुको स्थगित प्रतिनिधि सभा क्षेत्रीय निर्वाचन बुधबार हुने भएको छ । मंगलबारका लागि तय गरिएको निर्वाचत दुई पक्षीय विवादका कारण स्थगित गरिएको थियो ।
क्षेत्र नम्बर १ को मतदानस्थल र ३ को उम्मेदवारबिरुद्ध उजुरी परेपछि विवाद भएको थियो । जिल्ला पार्टी सभापति सुरेन्द्रराज आचार्यले ३ वटै निर्वाचन क्षेत्रको निर्वाचन मंसिर ८ गते बिहान ९ बजेबाट हुने बताए । क्षेत्र नम्बर १ को मतदानस्थल कपिलवस्तु नगरपालिका वडा नम्बर १० पचेहरामा गर्ने तथा क्षेत्र नम्बर ३ का क्षेत्रीय सभापतिका दुबै उम्मेदवारको उम्मेदवारी कायम रहने गरी सहमति भएको पार्टी सभापति आचार्यले बताए ।
क्षेत्र नम्बर १ को विवादको विषयमा तौलिहवामा र ३ को विषयमा गोरुसिंगेमा जिल्ला नेताहरुसँग सहमति भएको हो । १ को पचेहरा, २ को तौहिलवास्थित पार्टी कार्यालय र ३ को चन्द्रौटामा मतदान स्थल कायम गरिएको छ । कांग्रेस कपिलवस्तुको प्रतिनिधी सभा संघीय अधिवेशन विवादका कारण स्थगित गरिएको थियो । निर्वाचन क्षेत्र नम्बर १ र ३ मा दुई पक्षबीच विवाद भएपछि मंगलबारका लागि तय गरिएको जिल्लाको ३ वटै क्षेत्रमा हुने निर्वाचन सूचना निकालेर स्थगित गरिएको थियो ।
जिल्लामा कुल १ हजार ८१२ मतदाता छन् । निर्वाचन क्षेत्र नम्बर ३ मा ५ सय ९९, २ मा ६ सय ४८ र ३ मा ५६५ मतदाता छन् । क्षेत्र नम्बर १ मा अब्दुल मन्नान खा र टेक बहादुर शाही, २ मा केशव कुमार श्रेष्ठ र बिरेन्द्र मिश्रा र ३ मा हरि प्रसाद पोख्रेल र ब्रहानन्द उपाध्यायको संघीय क्षेत्रीय सभापतिमा उम्मेदवारी परेको छ । जिल्लामा सभापतिका लागि पौडल पक्षीय अब्दुल कलाम खा, देउवा पक्षीय राजेश आचार्य र पौडेल पक्षीय सुधाकर पाण्डेयले उम्मेदवारीको घोषणा गरी प्रचारप्रससारमा जुटेका छन् ।

प्रतिक्रिया दिनुहोस्