रुसद्वारा फिनल्याण्डतर्फ विद्युत् आपूर्ति बन्द



एजेन्सी । रुसले फिनल्याण्डतर्फ बिजुली आपूर्ति बन्द गरिदिएको छ । रुसको सबैभन्दा ठूलो बिजुली कम्पनी राओ नर्डिकले आपूर्ति गरिएको बिजुलीको भुक्तानी नगरेको कारण शनिबारदेखि फिनल्याण्डलाई बिजुली आपूर्ति बन्द गरेको जनाएको छ ।

कम्पनीकाअनुसार बिजुलीको भुक्तानी प्राप्त गर्न केहि समस्याहरू उत्पन्न भएका थिए जसका कारण उनीहरूले आपूर्ति निलम्बन गर्ने निर्णय गरेको रुसको तास समाचार एजेन्सीले जनाएको छ । फिनल्याण्डको राष्ट्रिय विद्युत प्रसारण ग्रिड अपरेटर फिनग्रिडले पनि एक तथ्याङ्कमा सो कुराको पुष्टि गरेको छ । कम्पनीका अनुसार बजारमा बेचेको बिजुलीको भुक्तानी प्राप्त गर्न समस्या भएका कारण रूसबाट आयात गरिएको बिजुलीको थप बिक्री अर्को सूचना नभएसम्म रोकिनेछ ।

धेरै वर्षदेखि रूसबाट फिनल्याण्डमा बिजुली आयात हुँदै आएको छ । ‘यो अवस्था असाधारण छ र हाम्रो व्यापारिक इतिहासको बीस वर्षमा पहिलो पटक भएको हो’ कम्पनीले भन्यो ।

रुस र फिनल्याण्डबीच १ हजार ३ सय किलोमिटर लामो सीमा जोडिन्छ । आइतबारमात्र फिनल्याण्डले नेटोमा सदस्यताका लागि आवेदनको औपचारिक घोषणा गर्ने अपेक्षा गरिएको छ । यद्यपि फिनल्याण्डले नेटो सदस्यताका लागि आवेदन दिने विषय रुसबाट विद्युत् आपूर्तिसँग नजोडिएको तास समाचार संस्थाले जनाएको छ ।

प्रतिक्रिया दिनुहोस्