काठमाडौं : ओलम्पिक खेलका लागि एसियाली समूहको महिला फुटबल छनोटमा आज नेपालले म्यानमारसँग प्रतिष्पर्धा गर्दैछ ।
पहिलो खेलमा भारतसँग १–१ गोलको बराबरी खेलेको नेपालले आज दोस्रो खेलमा आयोजक म्यानमारको सामना गर्न लागेको हो । म्यानमारको यांगोनस्थित थुवुना रंगशालामा नेपाली समयानुसार साँझ सवा ५ बजे खेल सुरु हुनेछ ।
म्यानमारले पहिलो खेलमा बंगलादेशलाई ५–० ले पराजित गरेको थियो । म्यानमार यो समूहबाट अघिल्लो चरण प्रवेशका लागि दाबेदार टोली हो ।
आजै हुने अर्को खेलमा भारत र बंगलादेश भिड्नेछन् । अंक तालिकामा म्यानमार शीर्षस्थानमा छ भने नेपाल दोस्रो र भारत तेस्रो स्थानमा छ ।
समूह सी मा रहेको नेपालले आफ्नो अन्तिम खेलमा १३ तारिखमा बंगलादेशसँग प्रतिस्पर्धा गर्नेछ ।