सिरहा : लहानमा बर्थ डे पार्टीमा बोलाएर १५ वर्षीया किशोरीको र २० वर्षीया युवतीमाथि सामूहिक बलात्कार भएको छ । भाइटीकाको रात घटना भएको हो ।
इलाका प्रहरी कार्यालय लहानका डीएसपी राजेश थापाले बलात्कारमा संलग्न सात जनामध्ये तीन जनाको पहिचान भइसकेको बताए ।
प्रहरीले नाम सार्वजनिक गरेका आरोपमध्ये लहान नगरपालिका ११ का २३ बर्से हरि चौधरी, २१ बर्से अनिल चौधरी र अर्का २१ बर्से सुनील चौधरी छन् । पीडित दुवै जनाले दिएको बयानमा हरि चौधरीले आफ्नो जन्मदिन भएको बताएका थिए ।
दुई जनाले मोटरसाइकलले घरबाट लहान लिएर गएको र कोठामा केही समयपछि अरु पनि आएका र आफूहरुमाथि जबर्जस्ती गरेको पीडितले बताएका छन् ।
लहानस्थित रामकुमार उमाप्रसाद अस्पतालमा पीडितको स्वास्थ्य परीक्षण गरिएको छ । बलात्कार घटनामा संलग्न सातै जना फरार छन् । फरार सबैको विशेष प्रहरी परिचालन गरी तीव्र खोजी गरिएको छ ।
