काठमाडौं : धितोपत्र बजारमा आज शेयरको मूल्यमा दोहारो अंकको गिरावट आएको छ । नेपाल स्टक एक्सचेञ्जकाअनुसार कारोवार मापक नेप्से परिसूचक १७ दशमलब ३१ बिन्दुले ओरालो लागेर एक हजार २ सय ०५ दशमलब २२ बिन्दुमा झरेको छ ।
प्रतिशतका आधारमा १ दशमलब ४२ बिन्दुले बजार घटेको छ । ‘क’ वर्गका कम्पनीको कारोवार मापन गर्ने सेन्सेटिभ परिसूचक ४ दशमलब ११ बिन्दुले घटेर २ सय ५५ दशमलब ९८ बिन्दुमा पुगेको छ ।
नेप्से परिसूचकसँगै कारोवार रकममा समेत आज गिरावट आएको छ । कूल १ सय २५ कम्पनीको तीन लाख १४ हजार २ सय ९७ कित्ता शेयर रु नौ करोड ९४ लाख ५१ हजार ४८ मा खरिद बिक्री भएको थियो ।
कारोवार भएका कूल नौ उपसमूहमध्ये आज दुई उपसमूहको शेयरमा भने वृद्धि भएको छ । वित्त १ दशमलब २५ र अन्य शुन्य दशमलब ७३ बिन्दुले बढ्दा बैङ्किङ २५ दशमलब शुन्य आठ, होटल ३ दशमलब ५८, विकास बैङ्क ६ दशमलब शुन्य पाँच, जलविद्युत् १३ दशमलब २२, निर्जीवन बीमा ४३ दशमलब शुन्य सात, माइक्रोफाइनान्स ३ दशमलब शुन्य आठ र जीवन बीमा २९ दशमलब ११ बिन्दुले ओरालो लागेको छ ।
घटेको बजारमा स्वदेशी लघुवित्त वित्तीय संस्था, माहुली सामुदायिक लघुवित्त वित्तीय संस्थाका शेयरधनीले कमाएका छन् भने अपि पावर कम्पनी, स्ट्याण्र्डड चार्टड बैङ्क र नेपाल सेवा लघुवित्त वित्तीय संस्थाका शेयरधनीले आज गुमाएका छन् ।
स्टकले सञ्चालनमा ल्याएको पूर्ण स्वचालित अनलाइन कारोवार प्रणालीका कारण नेप्सेको बेबसाइटमा समस्या देखिएको छ । नेप्सेका प्रवक्ता मुराहरि पराजुलीले नयाँ प्रणाली जडान गर्दा केही समस्या आएको स्वीकार गर्दै प्राविधिक समस्या समाधानका लागि जुटेको जानकारी दिए ।
