रौतहट : गुणस्तर तथा नापतौल क्षेत्रीय कार्यालयले प्रदेश २ का रौतहट, बारा र पर्साका १९ पेट्रोलपम्पलाई कारबाही गरेको छ ।
आर्थिक वर्ष २०७५/७६ मा गुणस्तर तथा नापतौल क्षेत्रीय कार्यालय वीरगञ्जले रौतहट, बारा, पर्सा, चितवन र मकवानपुरमा रहेका ८ सय ९१ पेट्रोलपम्पमा अनुगमन गर्दा सफ्टवेयर जडान गरी उपझोक्ता ठगी गरेका गुणस्तर तथा नापतौल क्षेत्रीय कार्यालयले जानकारी दिएको छ ।
कारवाहीमा परेका पेट्रोलपम्पमा बाराको विजय आयल स्टोर, महम्मद आयल स्टोर, शिवशङ्कर ट्रेडर्स, जयविकास आयल स्टोर, हरिओम आयल स्टोर र बाबा आयल ट्रेडर्सका सञ्चालकलाई जनही १० हजार जरिवाना तथा तीन महीना कैद सजायको दाबी गरिएको छ ।
यसैगरी खान आयल स्टोर रौतहट, बारा जिल्लाकै अमित आयल स्टोर, कृष्णा आयल स्टोर, आयुष आयल स्टोर, सोनु आयल स्टोर तथा पर्साका अर्निका ट्रेडर्स बिक्रेताका सञ्चालकलाई जनही तीन वर्ष कैद र ३० हजार जरिवानाको माग दाबी गर्दै मुद्दा दायर गरिएको छ ।
त्यस्तै नापतौल ऐन र कानूनविपरीत काम गरेको आरोपमा हेटौँडाको एशियन पेन्टस् उद्योगमाथि गुणस्तर कार्यालयले मुद्दा दायर गरेको छ । त्यसैगरी किसन एग्रो केमिकल प्रालि पर्सा र जगदम्बा आयल ट्रेडर्स बारामा नापतौल कमी रहेकाले कारवाही प्रक्रिया अगाडि बढाइएको कार्यालयले जनाएको छ ।
हुलास स्टिल प्रालि बारा, अपोलो फिड्स प्रालि चितवन, पञ्चरत्न फिड्स प्रालि चितवन र विनायक स्टील प्रालि चितवनले स्वीकृत क्षमताभन्दा बढीको धर्मकाटा प्रयोग गरी राजश्व छलेको भेटिएपछि एक वर्ष कैद र १० हजार जरिवानाको माग गर्दै अदालतमा मुद्दा दायर गरिएको यादवले बताए ।
