काठमाडौं : पार्टी स्कुल विभाग प्रमुख दाबी गर्दै आएका डा। बेदुराम भुसालले सुरक्षा विभाग प्रमुख बन्न अस्वीकार गरेका छन् । त्यही विभागको नेतृत्वसमेत गरेको अनुभवका आधारमा आफ्नो रुचि स्कुलमा रहेको जानकारी गराए पनि फरक विभागमा प्रस्ताव गरिएको भन्दै भुसालले जिम्मेवारी लिन अस्वीकार गरेका हुन् ।
भुसालले रुचिविपरीत जिम्मेवारी दिइए अस्वीकार गर्ने चेतावनी दिएपछि महासचिव विष्णु पौडेलले उनको नाम प्रस्तावित सूचीबाट अन्तिममा हटाइएको थियो ।
राष्ट्रिय सभा सांसदमा निर्णय भइसकेपछि अन्तिममा नाम हटाइएकाले उनलाई महत्वपूर्ण जिम्मेवारी दिनुपर्ने दबाबमा नेकपा नेतृत्व छ । भुसाललाई स्कुल विभाग उपप्रमुख बनाउने तयारी छ ।
तर, उनले यसबारे आफूलाई जानकारी नभएको बताए । ‘मैले आफ्नो रुचि बताइसकेको छु, त्यसभन्दाबाहेक नयाँ कुनै जानकारी आएको छैन ’ भुसालले भने । नयाँपत्रिका दैनिकबाट साभार
