यो हो दुनियाँकै ठूलो भ्यागुता



एजेन्सी : एउटा भ्यागुता कतिसम्म ठूलो होला ? अफ्रिकामा दुनियाँकै सबैभन्दा ठूलो भ्यागुता छ, जसको तौल ३ किलोभन्दा ठूलो छ। गोलियथ प्रजातिको उक्त भ्यागुताका बारेमा बर्लिनस्थित नेचुरल हिस्ट्री म्युजियमले गरेको अनुसन्धानले केही अनौठा तथ्यको खुलासा गरेको छ।

शोधकर्ताका अनुसार यो भ्यागुताले आफू बस्नका लागि आफैं नै सानो पोखरीको निर्माण गर्ने गर्दछ। कहिलेकाहीँ त आफ्नो लागि कुवा बनाउन यो भ्यागुताले दुई किलोभन्दा धेरै वजन भएका ढुंगाहरु पनि खनेर फ्याँक्ने गर्दछ। यो भ्यागुताको वजन ३ किलो ३ सय ग्राम छ भने यसको लम्बाइ ३४ सेन्टिमिटर अर्थात् १३ इन्चसम्म हुन्छ।

यो भ्यागुता भीमकाय त हुन्छ नै, आफ्नो सन्तानको हेरचाह पनि निकै विशेष तरिकाले गर्दछ। यो भ्यागुता जुन कुवामा बस्दछ त्यसमा जन्माएका बच्चाको सुरक्षाका लागि पानीमा फिँज निकालेर राख्दछ ताकि उक्त फिँजमा अन्य जनावरहरु नआउन्।

गोलियथ प्रजातिको यो भ्यागुता अफ्रिकी देश क्यामरुन तथा इक्विटेरियल गिनीलगायतका देशमा पाइन्छ। साथै दक्षिण अफ्रिकाको एम्पुला नदीको किनारामा पनि यो प्रजातिको भ्यागुता पाइन्छ। शोधकर्ताहरुले यो भ्यागुताका अण्डा रहेका विभिन्न २२ ठाउँ पत्ता लगाएका छन्। कतिपय ठाउँमा करिब २८ सय अण्डा पाइएका छन्।

प्रतिक्रिया दिनुहोस्