संघीयता र गणतन्त्रमाथि चौतर्फी ग्रहण लागेको छ : उपप्रधानमन्त्री यादव 



वीरगन्ज : उपप्रधान तथा स्वास्थ्यमन्त्री उपेन्द्र यादवले संघीयता र गणतन्त्रमाथि चौतर्फी ग्रहण लागेको बताएका छन्। मन्त्री यादवले अधिकारको लडाई लड्दा अधिकार प्राप्त भए पनि संघीयता र गणतन्त्रलाई नै समाप्त पार्ने चलखेल सुरु भएको बताए। 

वीरगन्ज बस टर्मिनलको समुद्घाटन कार्यक्रममा बोल्दै मन्त्री यादवले खतरामा रहेको लोकतन्त्र, गणतन्त्र र संघीयतालाई बचाउँनुपर्ने धारणा राखे। ‘अहिले खतरामा रहेको लोकतन्त्र, गणतन्त्र र संघीयतालाई बचाउँनुपर्छ’, उनले भने,‘जबसम्म समृद्धि हुँदैन तबसम्म विकास हुँदैन र विना समृद्धि र समानताले लोककल्याणकारी राज्यको निर्माण हुन सक्दैन।’

संघीय समाजवादी पार्टीका अध्यक्ष समेत रहेका यादवले विभेद र समानतालाई अन्त्य गरी जिम्मेवारी र दायित्वका साथ अघि बढ्नुपर्ने बताए। मन्त्री यादवले भएको श्रोत र साधनको सदुपयोग गरी विकासको गतिलाई तीव्र रुपमा अगाडि बढाउँनुपर्ने धारण व्यक्त गरे। वीरगन्ज महानगरपालिकामा अपेक्षा अनुसार विकास हुन नसकेको स्थानीयको गुनासो रहेको यादवले बताए।

उनले यस्ता गुनासोलाई अगामी दिनमा चिर्नका लागि विकासको गतिलाई तीव्र रुपमा लैजान सबैलाई निर्देशन दिए। मन्त्री यादवले भने,‘साधन श्रोतको कमि छ। तर, जे जति छ त्यसमा इमान्दारीपूर्वक काम गर्नुपर्छ। यसमा बहाना बाजी चल्दैन परिमाणमुखी काम हुनुपर्छ, नत्र भोलीको दिनमा जनताले यसको जवाफ माग्ने छन।’

उद्घाटन कार्यक्रममा प्रदेश–२ का मुख्यमन्त्री लालबाबु राउतले जनताको अपेक्षा अनुसार विकाश निर्मायाका काम हुन नसकेको स्वीकार गरेका छन्। उनले भने, ‘हामीलाई जनताले मत दिएर पठाएको हो। तर, आज उनीहरूको मतको कदर गर्न सकेका छैनौ। स्थानीय तहको सरकार बनेको दुई वर्ष वित्तिसक्यो तर, अपेक्षा अनुसार काम हुन सकेको छैन।’    

त्यस्तै सहरी विकासमन्त्री महम्मद इस्तियाक राईनले वीरगन्जले दिएको योगदानलाई कदर गर्दै विकासका योजना दिइएको बताए। उनले वीरगन्जमा २ हजार जना अट्ने अन्तर्राष्ट्रिय स्तरको सभाहल बनाउन रकम दिने घोषणा समेत गरे।

कार्यक्रममा वीरगन्ज महानगरपालिकाका मेयर विजय कुमार सरावगीले वीरगन्जमा अन्तर्राष्ट्रिय स्तरको सभाहल, व्यापारिक प्रदर्शनी केन्द्र, प्राविधिक विश्वविद्यालय, सिर्सिया करिडोर निर्माण, चक्रपथ निर्माण र  इन्जिनियरिङ कलेज स्थापनामा सहयोग गर्न प्रदेश तथा संघीय सरकारसँग आग्रह गरे।

प्रतिक्रिया दिनुहोस्