संसद्का दुवै सदनको बैठक ३९६ घण्टा चल्दा भत्ता खर्च साढे ७ करोड



काठमाडौँ । अघिल्लो आर्थिक वर्ष (आव) २०७९/८० मा संसद्का दुवै सदन बैठक ३ सय ९६ घण्टा चलेको थियो छ । यसरी चलेको बैठकको भत्ताबापत राज्य कोषबाट साढे ७ करोड रुपैयाँ खर्च भएको महालेखा परीक्षकको तथ्याङ्कले देखाएको छ ।

महालेखा परीक्षकको तथ्याङ्क अनुसार प्रतिनिधिसभा २०७९ को प्रथम अधिवेशन १ सय १० दिन चालु रहेकोमा २९ दिनमा जम्मा २८ पटक बैठक बसेको थियो ।

दोस्रो अधिवेशन १ सय ८० दिन चालु रहेकोमा ६९ दिनमा ६५ पटक बैठक बसेको थियो । प्रतिनिधिसभा बैठक उक्त वर्ष कुल २ सय ९६ घण्टा ३० मिनेट बसेको थियो ।

राष्ट्रिय सभातर्फ भने १३औँ अधिवेशन १ सय १० दिन चालु रहेकोमा १८ दिनमा १९ पटक र १४औँ अधिवेशन १ सय ८० दिन चालु रहेकोमा ३९ दिनमा ४८ पटक बैठक बसेको थियो ।

राष्ट्रिय सभा कुल १ सय घण्टा ६ मिनेट बसेको पाइएको छ । यसरी प्रतिनिधिसभाको प्रथम र दोस्रो अधिवेशन र राष्ट्रिय सभाको १३औँ र १४औँ अधिवेशनको बैठक भत्ताबापत ७ करोड ५६ लाख रुपैयाँ खर्च भएको महालेखाको ६१औँ वार्षिक प्रतिवेदनमा उल्लेख छ ।

प्रतिक्रिया दिनुहोस्