सल्यान : वनगाड कुपिण्डे नगरपालिकाका शिक्षकले गर्दै आएको आन्दोलन २० दिनपछि शनिबार फिर्ता भएको छ । नगरपालिकाले शिक्षक तथा कर्मचारीलाई तलव भत्ता उपलब्ध गराउने सहमति गरेसँगै आन्दोलन फिर्ता भएको हो ।
नगरपालिकाभित्रको विवाद साम्य भई यही मङ्सिर १८ गते नगरसभा हुने र तलब भत्ता उपलव्ध गराउने प्रतिबद्धता नगरप्रमुखले गरेपछि आन्दोलन फिर्ता लिइएको नेपाल शिक्षक महासङ्घ कुपिण्डेले जनाएको छ । नगर प्रमुख गोविन्द पुनले नगरसभापछि तलब उपलव्ध गराइने आश्वासन दिए ।
गत साउनदेखि तलव भत्ता नपाएको भन्दै नगरपालिकाभित्रका शिक्षकले गत कात्तिक २० गतेदेखि आन्दोलन गरेका थिए । सहमति भएपछि आइतबारबाट पठन पाठन शुरु गर्न अनुरोध गरिएको महासङ्घका अध्यक्ष अकवर पुनले जानकारी दिए ।
नगर प्रमुख र उपप्रमुखबीचको विवादका कारण समयमै नगरसभा हुन नसकेपछि शिक्षकलगायत कर्मचारीहरुले साउनदेखि तलब पाएका थिएनन । विकास निर्माणका कार्यसमेत प्रभावित भएका थिए । रासस
