चितवन : सशस्त्र द्वन्द्वका समयमा प्रयोग भएका हतियार, दस्तावेज लगायतलाई संकलन गरेर युद्ध संग्रहालय बनाउने गृहकार्य सुरु भएको छ। तत्कालीन माओवादी लडाकुको तेस्रो डिभिजन रहेको जिल्लाको शक्तिखोरमा युद्ध संग्रहालय निर्माणको पहल सुरु गरिएको हो।
सो क्षेत्र रहेको कालिका नगरपालिकाका प्रमुख खुमनारायण श्रेष्ठले नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ स्वयंले शक्तिखोरमा युद्ध संग्रहालय बनाउनुपर्ने घोषणा गरेपछि गृहकार्य सुरु भएको बताए।
श्रेष्ठले विश्वका द्वन्द्व भएका मुलुकमा संग्रहालय रहेको भन्दै कुन ठाउँमा कस्तो संग्रहालय बनाउने भन्ने विषयमा छलफल भइरहेको बताए।
सो क्षेत्रका प्रदेश सांसद घनश्याम दाहालले पूर्वलडाकू रहेको तेस्रो डिभिजनमा हाल नेपाली सेना रहेको भन्दै सेना हटेर औद्योगिक क्षेत्र बन्ने क्रममा ठाउँ तय गरी युद्ध संग्रहालय बनाइने बताए।
सो क्षेत्रमा प्रदेशस्तरीय औद्योगिक क्षेत्र बन्ने प्रक्रिया अघि बढिरहेको छ। दाहालले १० वर्षको जनयुद्धमा प्रयोग भएका हातहतियार, दस्तावेजसहित युद्ध कसरी भएका थिए भन्ने इतिहास झल्काउने कला कुँदेर देखाइने बताए।
युद्ध संग्रहालय आम नेपालीका लागि इतिहास र महत्वपूर्ण पर्यटकीय गन्तव्य बन्नसक्ने उनले बताए।
सो क्षेत्र महत्वपूर्ण पर्यटकीय गन्तव्य सौराहा नजिक पर्छ। क्षेत्रीय होटल संघ सौराहाका अध्यक्ष सुमन घिमिरेले विश्वका युद्ध भएका विभिन्न मुलुकमा युद्ध झल्कने संग्रहालय रहेको बताए।
ती ठाउँ स्वदेशी र विदेशी पर्यटकका लागि आकर्षक गन्तव्य बन्ने भएकाले चितवनको शक्तिखोरमा युद्ध संग्रहालय बनाउन सकेमा पर्यटक प्रवर्द्धनमा टेवा पुग्ने बताए। रासस
