एजेन्सी : अमेरिकाको शिकागोमा रहेको सेकेन्ड सिटी कमेडी क्लब विगत ६० वर्षदेखि उम्दा कमेडी शो देखाइरहेको छ । विगत केही समययता यसले संसारका ठूला कम्पनीका व्यवस्थापकहरूलाई तालिम दिँदै आएको छ ।
गूगल, फेसबूक, ट्विटर, नाइकी, म्याकडोनल्ड्स जस्ता ठूलाठूला कम्पनीले आफ्ना व्यवस्थापक, इन्जिनीयर र कार्यकारीहरूलाई यहाँ कमेडीको तालिम लिन पठाउने गरेका छन् ।
कमेडी क्लबका अध्यक्ष केली लेनर्डले कर्पोरेट कर्मचारीहरू ग्राहकसँग थप राम्ररी डील गर्न र सफ्ट स्किल बढाउन क्लब आउने गरेको जानकारी दिए ।
कम्पनीहरू आफ्ना कर्मचारी राम्रो मूडका साथ काम गरून् भन्ने चाहन्छन् । घमण्डी कर्मचारीहरूलाई राम्रो बनाउन पनि कम्पनीहरूले कमेडी क्लासमा पठाइरहेका छन् । कमेडी क्लासका कारण कर्मचारीहरूमा अरूको आइडिया स्वीकार गर्ने भावना उत्पन्न भइरहेको छ । उनीहरू एकअर्कासँग पनि खुलेर कुराकानी गरिरहेका छन् । सेकेन्ड सिटी क्लबले कमेडी सिकाएर पैसा पनि खुबै कमाइरहेको छ ।
क्लबले आफ्नो वार्षिक राजस्व ५ करोड डलर भएको बताएको छ । त्यसको एक तिहाइ भाग कमेडी क्लासको फीज भएको उसको भनाइ छ ।
सन् २००२ मा कम्पनीहरूका लागि कमेडी वर्कशप शुरू गरेको क्लबले ७०० भन्दा बढी क्लाइन्टसँग काम गरिसकेको छ ।
इम्प्रुभ असाइलमले पनि सेकेन्ड सिटी कमेडी क्लबले जस्तै कमेडीमा काम गर्छ । उसले कमेडी थिएटर चलाउने गरेको छ । गूगल, पीडब्ल्यूसी, हार्वडए, एमआईटी लगायतलाई पनि उसले कमेडी ट्रेनिङ दिइसकेको छ ।