तराई मधेस कार्यक्रमका लागि १३ योजना छानिए



लमही : दाङमा तराई मधेस समृद्धि कार्यक्रमका लागि १३ वटा योजना छनोट भएका छन् । तराई–मधेस समृद्धि कार्यक्रमका संयोजक रामहरि शर्माका अनुसार दाङका १३ वटा योजनाका लागि सात करोड ७५ लाख बजेट छुट्याइएको छ । 

सरकारले मानव विकास सूचकाङ्कमा तुलनात्मक रुपमा पछि परेका तराई–मधेसका स्थानीय तहमा भौतिक पूर्वाधारलगायत विकास कार्यक्रमलाई एकीकृत रुपमा सञ्चालन गर्न तराई–मधेस समृद्धि कार्यक्रम लागू गरेको छ । 

तराई–मधेसमा बसोबास गर्ने जनताको सघन रुपमा आर्थिक तथा सामाजिक रुपान्तरण गर्न एवं जनताको सार्वजनिक सेवामा पहुँच अभिवृद्धि तथा जीवनस्तरमा सुधार ल्याउने उद्देश्यले कार्यक्रम लागू गरिएको हो ।

 

यसअन्तर्गत शक्ति प्रावि लमहीलाई ५० लाख, दलित सचेतनाको लागि भवन निर्माण लमहीका लागि ३० लाख, जनता उच्च मावि गढवाका लागि ७० लाख, साधारण मावि गंगदी राजपुर भवन निर्माणका लागि ४० लाख, जनज्योति मावि बेला राजपुर भवन निर्माणका लागि ४० लाख, आधारभूत विद्यालय दुलैहैया राजपुरका लागि ४० लाख बजेट परेको छ । 

थारू संस्कृति भवन निर्माण गर्न राप्ती गाउँपालिकाका लागि ५० लाख, अस्पताल भवन निर्माण गर्न राप्ती गाउँपालिकाका लागि  २५ लाख, साविक धर्नाको नैनावारमा थारू महिला भवन निर्माण गर्न ३० लाख, घोराही उपमहानगरपालिकामा मुक्त कमलहरी भवन निर्माण गर्न ८० लाख, स्वास्थ्य चौकी भवन निर्माण गर्न घोराही उपमहानगरपालिका १, ३ र ८ वडाको लागि ५० लाख बजेट विनियोजन भएको उनले जानकारी दिए ।

यसै गरेर हाटबजार पूर्वाधार निर्माण घोराही उपमहानगरपालिकामा रु ५० लाख, प्राबि तिमिले बङलाचुली भवन निर्माणका लागि रु ३० लाख, आधारभूत विद्यालय कडुले बङ्गलाचुली भवन निर्माण गर्न रु ४० लाख, तरकारी तथा फलफूल बजार भौतिक पूर्वाधार तुलसीपुर उपमहानगरपालिका–६ का लागि रु एक करोड र राजापुर कपडादेवी थारू गाउँ हुँदै एयरपोर्ट सुकुमवासीटोल सडक कालोपत्रे तुलसीपुरका लागि रु ५० लाख बजेट पारेको शर्माले बताए । प्रतिनिधिसभा सदस्य मेटमनी चौधरीले थप महत्वपूर्ण योजनाका लागि प्रयास भइरहेको बताइन् । 

प्रतिक्रिया दिनुहोस्