कर्मचारीलाई सरकारको जवाफ : धर्ना, जुलुसमा उत्रिनुको कुनै अर्थ छैन



काठमाडौं : सञ्चार तथा सूचना प्रविधि मन्त्री गोकुल बास्कोटाले कर्मचारी समायोजन अध्यादेशका प्रावधानका विरुद्धमा कर्मचारीले आन्दोलन, धर्ना तथा जुलुसजस्ता कार्यक्रम गर्नुको औचित्य नरहेको बताएका छन् ।  

मन्त्रिपरिषद्का निर्णय सार्वजनिक गर्न आज आयोजित पत्रकार सम्मेलनमा उनले कर्मचारी समायोजनमा सरकारले काखा र पाखा नगरेको स्पष्ट पार्दै कर्मचारीको गुनासो सम्बोधन गर्न गुनासो सुनुवाइ समिति गठन भएको जानकारी दिए ।  

मन्त्री बास्कोटाले समितिमा प्रधानमन्त्री तथा मन्त्रिपरिषद् कार्यालय, अर्थ, सङ्घीय मामिला तथा सामान्य प्रशासनलगायत मन्त्रालयका प्रतिनिधि रहेको उल्लेख गर्दै भने, “कर्मचारीले अनुमानको भरमा सेवा, सुविधा यस्तो, त्यस्तो भनेर धर्ना, जुलुसमा उत्रिनुको कुनै अर्थ छैन ।”

सङ्घीय मामिला तथा सामान्य प्रशासन मन्त्रालयका अनुसार सङ्घअन्तर्गत ४६ हजार, प्रदेशमा २२ हजार र स्थानीय निकायअन्तर्गत ५८ हजार कर्मचारी समायोजन हुनेछन् । 

सरकारका प्रवक्तासमेत रहेका मन्त्री बास्कोटाले सङ्घ, प्रदेश र स्थानीय निकायका बीचमा सङ्घीयता कार्यान्वनका लागि सहजीकरण गर्न २९ बुँदे कार्य योजना तयार भई कार्यान्वयन सुरु भएको जानकारी दिए । 

हालै सम्पन्न अन्तर प्रदेश बैठकले सो सङ्घीयता कार्यान्वयन सहजीकरण कार्य योजना तयार पारेको थियो । उनले सङ्घीयतालाई बलियो बनाउन सरकारले प्राथमिकता दिएको बताए । 

सङ्घीय संसद्को हिउँदे बैठकलाई विधेयक अधिवेशन बनाउन सरकारले संसद् सचिवालयमा विभिन्न १२ विधेयक दर्ता गराएको जानकारी दिँदै मन्त्री बास्कोटाले अधिवेशनमा संविधानसित बाझिएका कानुनलाई संशोधन गरी पेस गर्ने बताए ।

उनले भने, “राष्ट्रपति पदको गरिमा उच्च छ । यसलाई अनावश्यकरुपमा विवादमा ल्याउने काम कहीँ कतैबाट गरिनु हुन्न । राष्ट्रपतिलाई मात्र उडान अवतरण गर्न सरकारले हेलिकप्टर खरिद गर्न लागेको होइन, यो त विशिष्ट व्यक्तित्व र आपत्कालीन अवस्थाका लागि पनि हो ।” 

मन्त्री बास्कोटाले सरकार नीतिगत तथा विधिगत सुधार गर्दै आर्थिक समृद्धिको यात्रामा अगाडि बढेको उल्लेख गरे । “सरकार बनाउने र गिराउने खेलको अन्त्य भएको छ, राजनीतिक स्थायित्वका साथमा अब आर्थिक स्थायित्वको नयाँ युगको सुरुआत भएको छ,” उनले भने । 

प्रवक्ता बास्कोटाले बहुचर्चित एवं बहुप्रतीक्षित मेलम्ची खाने पानी आयोजनाको काम समयै सम्पन्न हुने दृढतासमेत व्यक्त गरे । उनले भने, “जनताले तिरेको करबाट उठेको राजश्व जनताको विकासमा सरकारले खर्च गर्छ, अनावश्यरुपमा कहीँ कतै खर्च गर्दैन ।” 

मन्त्री बास्कोटाले सात वटै प्रदेशमा विपत् व्यवस्थापन केन्द्र स्थापना हुने जानकारी पनि दिए । 

प्रतिक्रिया दिनुहोस्