वीरगन्ज : वीरगन्जको नारायणी रंगशालालाई प्रादेशिक रंगशाला घोषणा गराउन शनिबार वीरगन्जमा बृहत सर्वपक्षिय बैठक बसेको छ । बैठकले नेपालकै दोश्रो नारायणी रगंशालालाई कसरी प्रादेशिक रगंशाला बनाउन सकिन्छ भन्नेबारे आन्दोलनमा कार्यक्रम सार्वजनिक गरेको छ ।
बैठकले पौष १६ गते नारायणी रगंशालामा मानव सांङ्लो बनाएर घेराउ गरी प्रदेश सरकारलाई दबाब दिने, पत्रकार र नागरिक अगुवाको नेतृत्वमा प्रदेश नम्बर २ को प्रादेशिक सरकारलाई ज्ञापन बुझाउने र डिपीआर तयार भइसकेकोले त्यसैअनुसार नारायणी रगंशाला निर्माण अन्तर्राष्ट्रिय स्तरको खेलकुद प्रतियोगिता हुनसक्ने प्रदेश रगंशाला बनाउन दबाब दिने निर्णय गर्यो ।
त्यसैगरी राजनीतिक दलहरुलाई ‘मेरा वीरगन्ज’ को नारासाथ माग र मुद्दाहरुप्रति प्रतिबद्ध गराउन खुल्ला मञ्चमा कार्यक्रम गर्ने, यो अभियानलाई सघाउन र सूचना आदानप्रदान गर्नको लागि एउटा फेसबुक पेज तथा ग्रुप समूह बनाउने निर्णय बैठकले गरेको हो । बैठकमा भएको निर्णयलाई सम्पूर्ण राजनीतिक दलका नेता, समाजसेवी, खेलकुद प्रेमी, युवा, महिला र संचारकर्मीहरुले सर्वसहमतबाट पारित गरेका थिए ।
१८ विगामा फैलिएर जिर्ण अवस्थामा रहेको नेपालकै दोश्रो रंगशालाको रुपमा रहेको वीरगन्ज नारायणी रंगशालालाई प्रादेशिक रगशाला घोषणा गराउन वीरगन्जका नागरिक समाजले सर्वपक्षिय भेलाको आयोजना गरेको थियो ।
भेलाका सहभागिबाट संकलन गरिएको रायसुझावको आधारमा नै पाचबु्ँदे निर्णय पारित गरिएको हुनाले यसलाई अभियानकै रुपमा सञ्चालन गर्ने आयोजक संस्थाका कन्चन झाले बताए ।
भेलामा राष्ट्रिय जनता पार्टी नेपालका महासचिव राजेशमान सिंहले दलगत स्वार्थ भन्दामाथि उठेर वीरगन्जको विकासमा सबै वर्गको सहयोग हुन आवश्यक रहेको बताए । उनले भने वीरगन्जको माटोलाई माया गर्छौ भने सम्पूर्ण वीरगन्जवासी एक ढिक्का भएर अगाडी बढनुपर्छ ।
राजपा नेपालका ६ वटै अध्यक्ष मण्डल, फोरम नेपालका अध्यक्ष उपेन्द्र यादव, नेपालीकाग्रेसका नेता विमलेन्द्र निधि, एमालेका नेता रघूविर महासेठलगायत शिर्ष नेताहरु पूर्वकै रहेका हुनाले वीरगन्जलाई अपहेलित गर्ने काम मात्र गरेको गुनासोसमेत नेता सिंहले गरे ।
कर्म गर्ने वीरगन्ज र फलपाउने जनकपुर, महासचिव सिंहले भने अब हामी पूर्वका नेताहरुको लागि वीरगन्ज कर्म स्थल बन्न दिदैंनौ वीरगन्जको विकासको लागि वीरगन्जकै युवा एकजुट भई सकेको हुनाले वीरगन्ज विकासको सवालमा नेताहरु सहमति नजनाए वीरगन्जमा प्रवेश मै रोक लगाउनुपर्छ ।
‘वीरगन्ज निवासी मुख्यमन्त्री लालबाबु राउत गद्दी प्रादेशिक रगंशाला वीरगन्ज मै हुनुपर्छ भनि एकशब्द बोलेनन् ।,’ नेता सिंहले भने, ‘मुख्यमन्त्रीले वीरगन्जको विकास गर्न चाँहदैन ।’
कार्यक्रममा वीरगन्जका उपमेयर शान्ति कार्कीले वीरगन्जलाई प्रारदेशिक राजधानी र नारायणी रगंशाला प्रादेशिक रगंशाला घोषणा गराउनको लागि प्रत्येक राजनीतिक दलका नेताहरुले आफनो जिल्ला अध्यक्षलाई दबाब दिनुपर्ने बताए ।
मध्यमाञ्चल खेलकुद विकास समिति वीरगन्जका संयोजक मानदेव हजरा, खेलकुद प्रेमी शिवशंकर पटेल, नेपाली कांग्रेसका जिल्ला कोषाध्यक्ष ईम्तीयाज आलम, नेकपाका नेता मनोज चौधरी, राजपाका सह महासचिव निजामुदिन समानी, वडा नम्बर १५ वडा अध्यक्ष गजेन्द्र पटेललगायतले प्रदेश सरकारले वीरगन्जप्रति देखाएको रवैयाको विरोध गर्दै, वीरगन्जवासीले आफनो अधिकार लिन एकजुट हुनुपर्नेमा जोड दिएका थिए ।
