मर्मत गर्न पठाइएको बोइङ २ महिनादेखि मलेसियामै अलपत्र



काठमाडौं: सामान्य मर्मतका लागि मलेसिया पठाइएको नेपाल वायुसेवा निगमको बोइङ विमान काठमाडौं नफर्केको बुधबार दुई महिना नाध्यो।

 

अझै मर्मत गरेर ल्याइने टुंगो लागिसकेको छैन । निगम व्यवस्थापनले बेलैमा मर्मत गर्न सामान झिकाउन नसकेपछि दुई महिनादेखि विमान मलेसियामा अलपत्र परेको खबर आजको कान्तिपुर दैनिकमा छ ।

 

‘इन्जिनको सी डक्ट उपकरण अमेरिकाबाट आइसक्यो मर्मत हुँदै छ,’ निगमका एक अधिकारीले भने, ‘उता न्यु इयर, क्रिसमस चलेकाले जहाज काठमाडौं कहिले आउँछ टुंगो लागिसकेको छैन।’

 

ती अधिकारीका अनुसार यस पटक त्यहाँ मर्मतको जिम्मा पाएको इन्जिनियरिङ कम्पनी डेभिएसनले सोमबारसम्म मर्मत गरिसक्ने भाका दिएको छ । यो विमान लिलाम गर्ने निर्णय पनि निगमले गरिसकेको छ।

 

संस्कृति, पर्यटन तथा नागरिक उड्डयन मन्त्रालयलाई निगमले पुस पहिलो साता यो विमान बिक्री गर्ने प्रक्रिया थालिसकेको विवरण पठाइसकेको छ । ‘विमान नै लिलाम गर्ने प्रक्रिया थालिसकिएकाले मर्मत गर्ने कि नगर्ने भन्ने अलमल देखिएको छ,’ निगमका एक अर्का निर्देशकले भने, ‘फेरि दुई महिनापछि यसको सी–चेकको मिति छ।’

 

विमानलाई हरेक २० देखि २४ महिनामा सम्पूर्ण उपकरणको विस्तृत निरीक्षण एवं चेकजाँच गर्नुपर्छ । यो विमानको सी चेकका लागि कम्तीमा पनि १४ करोड खर्च लाग्ने अनुमान गरिएको छ।

 

नेपाली नाम गण्डकी दिइएको यो ३१ वर्ष पुरानो बोइङको इन्जिन एक्सरे गराउनुपर्ने भएपछि कात्तिक ११ गते क्याप्टेन ओबी गुरुङ र दिपाल शेरचनले विमान काठमाडौंबाट क्वाललमपुर पुर्‍याएका थिए।

 

त्यसबेला इन्जिनियरले ‘दुई दिनमा मर्मत सकेर काठमाडौं ल्याइने’ भनेका थिए । क्लालालमपुरस्थित निगमले ट्रान्जिट प्वाइन्टमा विमान मर्मत गराउने जिम्मा दिएको डेभिएसन कम्पनीले यस विमानको दायाँ इन्जिन एक्सरे गर्दा गडबडी देखाएको थियो।

 

उक्त इन्जिनमा रहेको सी डक्ट जाँच्दा थुप्रै ‘स्टक्चरल डयामेज’ देखिएको निगमका एक इन्जिनियरले बताए । सी डक्टले विमान अवतरण गराउँदा हावा छलेर ब्रेक लगाउन मद्दत गर्छ । ‘अमेरिकाबाट झिकाइएको सी डक्टको मूल्य २ करोड हाराहारी पुगेको छ, यसको भन्सार महसुल मात्रै मलेसियामा २० लाख नेपाली रुपैयाँ परेको छ,’ स्रोतले भन्यो।

प्रतिक्रिया दिनुहोस्