पोखरा : प्रतिनिधिसभाको कास्की क्षेत्र नं. २ मा भईरहेको उपनिर्वाचनका कारण तीन राजमार्ग ठप्प हुन पुगेको छ ।
पृथ्वी राजमार्ग, पोखरा–बाग्लुङ राजमार्ग र सिद्धार्थ राजमार्गमा गुड्ने सबै सवारीले कास्की क्षेत्र नं. २ भित्रको सडकमार्गको प्रयोग गर्नुपर्ने भएका कारण त्यहाँ सवारी आवागमन ठप्प भएको हो । हिजो शुक्रबार रातिदेखि यी राजमार्गमा गुड्ने सवारीहरुलाई तीन वटा ठाउँ तोकेर प्रवेश र सञ्चालनमा रोक गर्न जिल्ला प्रशासन कार्यालयले सूचना जारी गरेपछि यस क्षेत्रमा सवारी आगमन बन्द भएको हो ।
कास्की क्षेत्र नं. २ मा अहिँले मतदान भईरहेकाले सवारी आवागमनमा रोक लगाईएको हो । यी तिन वटै राजमार्गमा अहिले सवारीहरु सहज रुपले गुड्न पाएका छैन्न । पूर्वमा तनहुँको सीमाना कोत्रे खोला पुल, पश्चिम–उत्तरमा पर्वत सीमाना नयाँपुल र दक्षिण–पश्चिममा भकुण्डे स्याङजा सीमानामा गाडी अहिँले रोकेर राखिएको छ ।
अति आवश्यक सेवा सवारी (एम्बुलेन्स, शवबाहन, दमकल, खानेपानी, ट्याङ्कर, दूरसञ्चार, विद्युत् र अस्पतालभित्रका सेवा) र चुनाव प्रयोजनका लागि पास लिएका सवारीसाधनलाई भने रोक लगाइएको छैन ।
प्रवेश बिन्दुमा रोकेर राखिएका सवारीलाई प्रत्येक तीन–तीन घण्टाको अन्तरालमा स्कर्टिङ गर्ने व्यवस्था मिलाइएको छ । ती सवारीले बीचमा कुनै सवारी चढाउन र ओराल्न पाउने छैनन् । चुनावको समयमा अन्य जिल्लाबाट आउने सवारी प्रवेशमा पनि कडाइ गरिएको छ भने सुरक्षा व्यवस्था पनि कडा पारिएको कास्की प्रहरीले जनाएको छ ।
