बालबालिकाको प्रश्न : प्रधानमन्त्री बन्छु भन्ने सोच्नुभएको थियो ?



काठमाडौं : “हजुर, जस्ता प्रश्नको पनि उत्तर सामान्य ढङ्गबाट दिनुहुन्छ, यहाँले जस्तो अथाह ज्ञान पाउन हामीले कसरी पढ्ने होला ?”, जेभियर्स इन्टरनेशनल स्कुलका छात्र प्रज्ञान बस्नेत प्रधानमन्त्री केपी शर्मा ओलीलाई एउटा सामान्य लाग्ने गम्भीर प्रश्न राखे ।

प्रश्न खस्ने बित्तिकै नेपाल प्रज्ञा प्रतिष्ठानको खचाखच हल पररर… तालीले गुञ्जियो । अच्चम्मको प्रश्न सुनेर स्वयं बालबालिका मुखामुख गरेर हाँसे । बालबालिकाको सामुन्य थिए प्रधानमन्त्री केपी शर्मा ओली । उनी पनि प्रश्न सुनेर छक्क परे । अनि मन्द मुस्कुराए ।

“ज्ञान संसारमा यति धेरै छ, विश्व ज्ञानको भण्डार हो, त्यसको हामीले एउटा सानो अंश मात्रै प्राप्त गर्न सक्छौँ, भाइबहिनीहरुलाई जुन मसँग अथाह ज्ञानको भण्डार छ भन्ने लागेको छ, त्यो साँचो होइन”, उनीहरुको जिज्ञासा मेटाउँदै प्रधानमन्त्रीले थपे, “विश्वमा ज्ञानको भण्डार अथाह भएकाले आफूलाई चाहिने र विषयगत ज्ञान प्राप्त गर्नुपर्छ ।”

नेपाल प्रज्ञा प्रतिष्ठानमा आज ‘बालबालिकासँग प्रधानमन्त्री’ कार्यक्रम थियो । चिटिक्क सजाइएको प्रतिष्ठानको हलमा प्रधानमन्त्री ओली स्काउटको पोसाकमा थिए । बालबालिका पनि स्काउट पोसाकमै थिए ।

उक्त कार्यक्रममा बालबालिकाले प्रधानमन्त्रीलाई विभिन्न प्रश्न तेर्साए । प्रफुल्लित देखिएका प्रधानमन्त्री ओलीले पनि सहज र सरल रुपमा जिज्ञासा मेटाए ।

बालबालिकासँग सवालजवाफ गर्न पाउँदा प्रधानमन्त्रीको अनुहारमा छुट्टै चमक देखिन्थ्यो । प्रधानमन्त्रीसँग जिज्ञासा राखेर नजिकबाट नियाँल्न पाउँदा बालबालिकाहरु खुशी नहुने कुरै भएन ।

उनीहरुले प्रधानमन्त्रीलाई बाल्यकालका स्वभावदेखि भविष्यको लक्ष्य, राजनीतिक घटनाक्रम र समसामयिक विषयका प्रश्न राखे । “बाल्यकालमा तपाईंको लक्ष्य के थियो ? प्रधानमन्त्री बन्छु भन्ने सोच्नुभएको थियो ?” विनम्र श्रेष्ठले सोधे । “एक दुर्गम गाउँमा त्यसमाथि अहिलेभन्दा ६८ वर्षअघि गाउँको साधारण किसान परिवारको बालकले देशको प्रधानमन्त्री बन्छु भन्ने सपना देख्नु र परिकल्पना गर्नु सम्भव थिएन”, प्रधानमन्त्रीले जवाफ फर्काए ।

शिक्षक, विद्वान जो देख्यो त्यही बन्न मन लाग्ने गरेको बाल्यकालको अनुभव सुनाउँदै उनले समाजका विकृति देखेपछि भने त्यसविरुद्ध आवाज उठाउनुपर्छ भन्ने कुराको बोध भएको प्रतिक्रिया दिए । बालबालिकाको जिज्ञासामा उनले प्रधानमन्त्री हुन महान् उद्देश्य लिएर इमान्दार भएर लाग्नुपर्ने सुझावसमेत दिए ।

बालबालिकासँगको सवाल जवाफका क्रममा प्रधानमन्त्री ओलीकी धर्मपत्नी राधिका शाक्य पनि थिइन् । शाक्यले अन्तक्रियालाई खुब चासो दिएर नियालिरहिन् । बाल्यकालको स्वभाव बारेको जिज्ञासामा प्रधानमन्त्री ओलीले इमान्दार, झुटो नबोल्ने र खेल्न बढी रुचाउने खालको थियो भनिन् । उनले विद्यार्थीलाई पढाइमा ध्यान दिनसमेत आग्रह गरिन् ।

प्रधानमन्त्री ओली बालकालिकासँग औधी रमाउँछन् । अघिल्लो वर्ष एचआइभी सङ्क्रमति बालबालिकाको प्रतिभा देखेर दङ्ग परेका प्रधानमन्त्री ओलीले उनीद्वारा प्रस्तुत गीतसङ्गीतमा भरपुर मनोरञ्जन लिएका थिए । उनले आज अङ्ग्रेजी नयाँ वर्षको पहिलो दिन भएकाले सबैलाई शुभकामना दिँदै सफलता र राम्रो स्वास्थ्यको कामना गरे । प्रधानमन्त्री ओलीले सुझाव दिँदै भने, “इमान्दारिता नै सफलताको सूत्र हो ।”

उनले आफू जस्तै बालबालिका पनि खुशी हुनुपर्नेमा जोड दिँदै आफूले भविष्य र नयाँ पुस्ताका लागि काम गरिरहेको जानकारी गराए । कार्यक्रममा छजना बालबालिकाले प्रधानमन्त्रीलाई प्रश्न राखेका थिए । बालबालिकासँग महत्वपूर्ण कार्यक्रम राखेको भन्दै उनले नेपाल स्काउटलाई धन्यवाद दिए । –रासस

प्रतिक्रिया दिनुहोस्