बाँके : प्रदेश नंं.५ का मुख्यमन्त्री शंकर पोखरेलले पर्यटन प्रवद्र्धनका लागि भौतिक पूर्वाधार र आतिथ्य सत्कारमा विशेष ध्यान दिनुपर्ने बताएका छन् ।
बाँकेको बैजनाथ गाउँपालिका-६, लालपुरस्थित न्यू हरियाली सामुदायिक वन उपभोक्ता समूहको जंगल हाताभित्र निर्माण गरिने मानसरोवरको प्रतीकात्मकस्थल सहितको वनस्पति उद्यानको सोमबार शिलान्यास गर्दै उनले भने,“बोटबिरुवाले मात्र पर्यटक आकर्षण गर्न सक्दैन, त्यसका लागि भौतिक संरचनाका साथै आतिथ्य संस्कारमा समेत विशेष ध्यान दिनुपर्दछ ।”
उनले स्थानीय सरकारले पनि पर्यटन प्रवद्र्धनका लागि योजनाबद्ध तरिकाले लाग्न जरुरी रहेको उल्लेख गर्दै प्रदेश सरकारले निर्माण गर्ने संरचनाको संरक्षणका लागि स्थानीय सरकार प्रतिबद्ध हुनुपर्नेमा जोड दिए । “स्थानीयवासीको प्रत्यक्ष सहभागिता भए मात्र वनस्पति उद्यानको योजनाले पूर्णता पाउनेछ”, उनले भने ।
प्रदेश सरकारबाट विनियोजित रकममध्येबाट डिभिजन वन कार्यालय बाँकेको आर्थिक वर्ष २०७६-७७ को वार्षिक बजेट कार्यक्रम अन्तर्गत वनस्पति उद्यानको योजना अगाडि बढेको छ । राज निर्माण सेवा नेपालगञ्जसँग १ करोड ६ लाख ८ हजार २९१ मा २०७६ पुस २४ गते सम्झौता भई २०७७ साल असार २५ गतेसम्म निर्माणसम्पन्न हुनेगरी निर्माण कम्पनीले काम शुरु गरेको डिभिजन वन कार्यालय बाँकेका डिभिजनल वन अधिकृत मोहन श्रेष्ठले बताए ।
बैजनाथ गाउँपालिका अध्यक्ष मानबहादुर रुचालले प्रदेश सरकारले मानसरोवरको प्रतीकसहितको वनस्पति उद्यानका बनाउनका लागि बैजनाथलाई छनोट गरेकोमा प्रदेश सरकारप्रति आभार व्यक्त गर्दै योजना कार्यान्वयनका लागि आवश्यक सबै सहयोग गर्ने प्रतिबद्धता व्यक्त गरे । रासस
