कपिलवस्तु : भारतसँग सीमा जाेडिएका जिल्लाहरुमा पुराना भाँडाकुडा साट्ने निहुँमा चोरी र लुटपाट गर्ने प्रवृत्ति बढेको छ । घरमा प्रयोग भएका पुराना भाँडाकुडा साट्न भन्दै आउने महिलाहरु नै चोरी र लुटपाटमा संलग्न हुनेगरेको खुल्न आएको छ ।
शुक्रबार दिउँसो कपिलवस्तुको शिवराज नगरपालिका वडा नं. ४ सोनवर्षीमा भाँडा खरिद गर्ने निहुँमा आएकी एक महिलाले १० तोला लुटेको स्थानीयले आरोप लगाएका छन् ।
सोनवर्षीका चार जना महिलाहरुले पुराना भाँडा खरिद गर्न आएकी एक अपरिचत महिलाले पिठ्यु सुम्सुमाउँदै बेहोस बनाएर १० तोला बराबरको सुन लगेको बताएका छन् ।
शुक्रबार दिउँसो गाउँ पसेकी ती महिलाले 'मोहनी मन्त्र' गरी सुन लुटेको पीडित सीता भुसाल, भूमीका कँडेल, लक्ष्मी कँडेल र पिंकी खत्रीले आरोप लगाएका छन् । होसमा आएपछि आफूहरु लुटिएको थाहा पाएको बताउने चारै महिलाले वडा प्रहरी कार्यालय चन्द्रौटामा उजुरी दिएका छन् ।
प्रहरीले लुटपाटमा संलग्न महिलाको पहिचान भएकाले खोजी भइरहेको बताएको छ ।
